«Амплітуда Смеласці» зняла кліп на верш Генадзя Бураўкіна

Гурт, якi ўзначальвае Петр Клюеў, прэзэнтавала кліп на акустычную версію песні «Асцярожна, Лістапад».

Гурт «Амплітуда Смеласці» прэзэнтуе кліп на акустычную версію песні «Асцярожна, лістапад», напісаную на словы аднайменнага верша Генадзя Бураўкіна.

У кліпе апавядаецца звычайная жыццёвая гісторыя пра хлопца, які шукае сваё сапраўднае каханне, сваю адзіную дзяўчыну. Праз пошукі ўсе ягоныя любошчы выкрываюцца, і толькі тады хлопец разумее, хто ёсць ягоным сапраўдным каханнем. Усе супадзенні з рэчаіснасцю (не) выпадковыя.

Кліп быў зняты ўлетку 2016 года. Яго асаблівасцю з'яўляецца тое, што ён быў зняты на адну камеру за 1 здымачны дзень. Рэжысёрам, аўтарам сцэнару, аператарам і рэжысёрам мантажу ў адной асобе выступае Аляксей Сапрыкін.

«Ніхто не хоча рабіць памылак у сваім жыцці, усе хочуць вучыцца на чужых памылках. Але, так здараецца, што мы робім памылкі, праз якія потым пакутуем усё сваё жыццё. Наш шлях можа быць розным, але ў кожным выпадку мы маем прыйсці да разумення таго, што ёсць для нас сапраўднае шчасце, - кажа Аляксей пра гэты кліп.

У кліпе здымаліся: Пятро Клюеў, Паліна Мартынава, Ірэна Гацко і Алена Судзілоўская, піша «Новы час».

Гурт «Амплітуда Смеласці» - гэта супольнасць музыкаў, аб'яднаных любоўю да Беларусі, асаблівым музычным густам і здольнасцю эксперыментаваць ва ўсякіх творчых выяўленнях. Гурт быў створаны беларускамоўным музыкам, кампазітарам і вакалістам Пятром Клюевым. «Амплітуда смеласці» з'яўляецца ўдзельнікам 7-га сэзону ўкраінскага шоу «Х-Фактар».