Аўтуховіч: Хутка мы ўбачым перамены і бел-чырвона-белы сцяг над Беларуссю

Лідар прадпрымальнікаў пракаментаваў акцыю за нацыянальны сцяг у цэнтры Менска.

Пра гэта лідар камітэта падтрымкі прадпрымальнікаў «Салідарнасць» Мікалай Аўтуховіч напісаў у сваім акаўнце на «Фэйсбуку».

«Было б справядліва адзначыць яшчэ аднаго найкаштоўнейшага падпісчыка на ўчорашняй акцыі, арганізаванай Дзмітрыем Дашкевічам. На фота Тамара Антонаўна Сурына – жонка таго самага ветэрана-партызана Мікалая Макаравіча Сурына. Менавіта яна папрасіла маіх сяброў адвезці іх на месца збору подпісаў.

А сёння хацелася б павіншаваць Тамару Антонаўну з Днём настаўніка! Тамара адпрацавала настаўніцай 54 (!) гады! Яна вельмі актыўны і прынцыповы чалавек, заўсёды размаўляе на роднай мове, доўгі час была распаўсюдніцай незалежнай прэсы і даносіла да людзей тое, чаго яны не заўважалі.

З Днём настаўніка, дарагая Тамара! Здароўя Вам і Вашым родным! Каб хутка Вы і мы ўсе ўбачылі перамены ў нашай краіне і бел-чырвона-белы сцяг, узняты над усімі дзяржаўнымі будынкамі Беларусі! Дзякуй Вам за тое, што Вы ёсць і натхняеце нас сваім прыкладам!» – напісаў Аўтуховіч.