Алег Трусаў: Урачыста здамо ў музей «зялёныя» сімвалы і заменім нацыянальнымі
4- 2.10.2016, 18:02
- 7,201
Старшыня ТБМ упэўнены, што нацыянальныя сімвалы неўзабаве здабудуць дзяржаўны статус.
Старшыня Таварыства беларускай мовы (ТБМ) Алег Трусаў заявіў у інтэрв'ю «Радыё Рацыя», што бел-чырвона-белы сцяг і Пагоня абавязкова стануць дзяржаўнай сімволікай.
– Няўжо Лукашэнка пойдзе на вяртанне Пагоні і бел-чырвона-белага сцяга?
– Думаю, і не варта чакаць ад яго немагчымага. Даць ім адпаведны статус, каб за іх не рэпрэсавалі носьбітаў. Памяняецца сітуацыя – урачыста здамо ў музей «зялёныя» сімвалы і заменім нацыянальнымі. Была ж такая сітуацыя, напрыклад, у Францыі. Галоўнае – мову захаваць!
– Не магу не спытацца пра забаўны факт. У часы заснавання ТБМ пасведчанне нумар адзін было выдадзенае... Вячаславу Кебічу. Няўжо ён і цяпер у вашых шэрагах?
– Не, быў выключаны. І яшчэ не пры мне. Мая мэта – захаваць і ўмацаваць, наколькі магчыма, арганізацыю. Ну і потым няхай маладыя бяруць уладу! – заявіў Трусаў.
Алег Трусаў упершыню абвесціў, што надалей больш не будзе балатавацца на пасаду старшыні ТБМ, а сыдзе на «вольныя навуковыя хлябы». Маўляў, каб на практыцы даць дарогу маладым.