Расейская спартоўка адмовілася вяртаць залаты алімпійскі медаль

Кідальніца молата Таццяна Лысенка адмовілася вяртаць залаты медаль Алімпіяды 2012 года ў Лондане.

Муж і трэнер расейскай кідальніцы молата Таццяны Лысенкі (пасля замужжа - Белабародава) Мікалай Белабародаў заявіў, што спартоўка не збіраецца вяртаць залаты медаль, атрыманы ёй за перамогу на Алімпіядзе 2012 года ў Лондане, паведамляе РБК.

На пачатку кастрычніка МАК прыняў пастанову пазбавіць Белабародаву ўзнагароды на падставе пераправеркі допінг-пробы.

Расейка выйграла спаборніцтвы ў Лондане з алімпійскім рэкордам. Яна кінула молат на 78,18 метра. Другое месца заняла польская спартоўка Аніта Владарчык. Цяпер польская лёгкаатлетка атрымае золата, немка Бэці Хайдлер - срэбра, а кітаянка Чжан Вэньсю - бронзу.

У спробе расейкі быў знойдзены забаронены прэпарат дэгідрахлорметылтэстастэрон (турынабол).

«Вядома, ніякі медаль мы вяртаць не збіраемся. Па-першае, Таня ўжо сказала, што мы будзем судзіцца, справа не завершана. Па-другое, кар'еру яна скончыла і ў любым выпадку больш выступаць не будзе. Думаю, для многіх яна як была, так і засталася алімпійскай чэмпіёнкай. З намі вядуць сябе не па-чалавечы, і я не вельмі разумею, чаму мы зараз павінны раптам вярнуць медаль.

Вось нашу краіну папракаюць у дакладзе, маўляў, што ў нас дзяржаўная сістэма падтрымкі допінгу. Так калі ў нас сістэма, чаму ж з намі за ўвесь гэты час ніхто не звязаўся, ніякай дапамогі з адвакатамі і аховай не прапанаваў? За нас ніхто не заступіўся, а зараз раптам мы павінны аддаць медаль? Не, я на гэта не пайду»- распавёў Мікалай Белабародаў.

Кіраўніца прававога ўпраўлення АКР Аляксандра Брыльянтава заявіла, што расейскія спартоўкі, абвінавачаныя МАК ва ўжыванні допінгу, не вярнулі ніводнага медалю з ліку заваяваных на Алімпійскіх гульнях 2008 і 2012 гадоў. МАК абавязаў АКР забяспечыць вяртанне медалёў усіх спартоўцаў, якія выкарыстоўвалі забароненыя прэпараты.

«Працэс вяртання медалёў у нас абсалютна не наладжаны. І ў нас няма інфармацыі аб тым, што хаця б адна алімпійская ўзнагарода ўжо вернутая. У нас у краіне не той узровень свядомасці.

АКР са спартоўцамі, у мінулым якія ўваходзілі ў склад алімпійскіх каманд, узаемадзейнічае праз адпаведныя нацыянальныя федэрацыі. Мы звяртаемся і ва Усерасейскую федэрацыю лёгкай атлетыкі, і ў Федэрацыю цяжкай атлетыкі Расеі, каб яны аказалі нам усялякае садзейнічанне», - заявіла Брыльянтава.