Заўтра ў Менску пройдзе шэсце на Дзяды

Арганізатары шэсця заклікаюць удзельнікаў прыносіць з сабой бел-чырвона-белыя сцягі, кветкі і свечкі.

Кансерватыўна-хрысціянская партыя БНФ 30 кастрычніка правядзе жалобную акцыю, прымеркаваную да дня памяці продкаў - Дзяды, паведамляе «Белсат».

Акцыя дазволеная Менгарвыканкамам, збор удзельнікаў пачнецца аб 11:00 на пляцоўцы каля гадзіннікавага завода «Прамень». З 11:30 да 15:00 запланаванае шэсце да ўрочышча Курапаты, дзе да 17:00 будзе праходзіць мітынг.

Арганізатары заклікаюць удзельнікаў прыносіць з сабой бел-чырвона-белыя сцягі, кветкі і свечкі.

Пасля мітынгу ў Курапатах усталююць драўляны крыж, які ўдзельнікі шэсця будуць несці да Курапатаў.

Курапаты - самае вядомае месца масавага пахавання ахвяр сталінскіх рэпрэсій у Беларусі.