На «Беларуськаліі» зноў загінуў рабочы

Праходчык 1994 года нараджэння быў задушаны тэхнікай, якая знаходзілася ў аварыйным стане.

Трагедыя адбылася на 2-м рудніку прадпрыемства. Пра гэта паведамляе найбуйнейшая супольнасць Салігорска ў сацыяльнай сетцы «Вконтакте».

«Паводле не пацверджанай пакуль інфармацыі прыкладна а 8.30 сёння, на адным з гарызонтаў пры праходцы ўхілу на 4-ы гарызонт, камбайнам (рэжучай прыладай) зарэзала аднаго з рабочых трэста «Шахтаспецбуд» - Іллю С., 1994 года нараджэння. Астатняя інфармацыя будзе толькі ад афіцыйнай крыніцы. Выказваем спачуванні сям'і загінулага», - гаворыцца ў паведамленні.

Адзін з удзельнікаў форуму пад нікам Artyom паведаміў падрабязнасці трагедыі:

«У камбайна наканечнік (рэжучы інструмент) адваліўся, і прыціснула, ён на нітах трымаецца, ніхто не агледзеў хутчэй за ўсё тэхніку перад запускам, не выконвалі правілы тэхнікі бяспекі. Наканечнік нармальна так важыць, тым больш калі ў руху».

Нагадаем, што 26 кастрычніка на «Беларуськаліі» пры будаўніцтве новага склада замест згарэлага звалілася з вялікай вышыні люлька з пяццю працоўнымі. У выніку адзін рабочы загінуў, яшчэ двое трапілі ў лякарню.