За дзень да выбараў Клінтан апярэджвае Трампа на 4%

Лідарства Клінтан пацвярджаюць усе найбольш аўтарытэтныя рэйтынгавыя агенцтвы.

Кандыдатка ў прэзідэнты ЗША ад Дэмакратычнай партыі Хілары Клінтан апярэджвае свайго апанента ад Рэспубліканскай партыі Дональда Трампа на чатыры адсоткавыя пункты. Пра гэта сведчаць звесткі апытання, праведзенага супольна ABC News і Washington Post за дзень да выбараў (пераклад – РБК).

Паводле даследавання, 47% выбаршчыкаў заявілі аб сваёй падтрымцы Клінтан, у той час як 43% заявілі аб падтрымцы Трампа.

Паводле апытання CBS, Клінтан абганяе Трампа на чатыры адсоткі. Кандыдатка ад дэмакратаў набрала 45% падтрымкі, Трамп — 41%, удакладняе Reuters.

Лідарства Клінтан паказвае і апытанне Bloomberg — яе вынік склаў 44 супраць 41% у Трампа.

У апытанні ABC News, апублікаваным напярэдадні, паведамлялася, што Клінтан апярэджвае Трампа на пяць адсоткаў. За Клінтан былі гатовыя прагаласаваць 48% рэспандэнтаў, а за Трампа — 43%.

Выбары прэзідэнта ЗША адбудуцца 8 лістапада.