Новая зорка біятлона Дар'я Юркевіч падзарабляе манікюрам
5- 1.12.2016, 15:39
- 17,753
Яшчэ летась Дар'я не была ўпэўненая, што яе спартовая кар'ера будзе працяглай.
У апошні дзень восені свет даведаўся аб новай зорцы беларускага біятлона — 28-гадовай Дар'і Юркевіч.
Яна здабыла бронзу ў індывідуальнай гонцы на этапе Кубка Свету ў Эстэрсундзе.
Адстралялася на нуль пры такіх пагодных варунках, калі нават знакамітая Кайса Макарайнэн зрабіла сем пудлаў.
Але яшчэ летась Дар'я не была ўпэўненая, што яе біятлонная кар'ера будзе працяглай. І быў у яе запасны варыянт — нэйл-дызайн, паведамляе «Еўрарадыё».
Дагэтуль у сацыяльных сетках ёсць супольнасць «Дар'я Юркевіч/Манікюр, педыкюр. Менск». Там біятланістка пазначаная як «майстар».
Там выстаўленыя ўзоры работ. Але не паказаныя кошты. Сярод удзельнікаў супольнасці пераважна сябры і прыхільнікі Дар'і. Колькі каштуе такі манікюр, ніхто не прызнаецца: «Звяртайцеся ў нашу прэс-службу».
Хоць часцей за ўсё біятланісткі знаходзяцца на спаборніцтвах і зборах, падпрацоўка, мабыць, не бывае лішняй. Адна з калегаў Юркевіч у нацыянальнай камандзе кажа, што далёка не ўсе беларускія лыжніцы фінансава забяспечаныя: «Ёсць вынік — ёсць грошы, няма выніку — няма грошай».
Летась на старонцы ў сацсетках «Біятлон online» Юркевіч адказвала на пытанні заўзятараў. У кожным чацвёртым адказе яна згадвала пра манікюр: што вельмі любіць яго рабіць калегам па камандзе ў вольны час, што звязала б сябе з гэтай справай, калі б не біятлон.
Але відавочна, што бронза ў Эстэрсундзе надоўга адсуне памкненні Дар'і зарабляць манікюрам, а не спортам. Пакуль матэрыял рыхтаваўся да публікацыі, супольнасць «Дар'я Юркевіч/Манікюр, педыкюр. Менск» зрабілі закрытай і перайменавалі.