Раман Грабарэнка падпісаў кантракт з менскім «Дынама»

Пагадненне з гульцом зборнай Беларусі разлічана да канца сезона 2016/17.

24-гадовы выхаванец магілёўскага хакея большую частку кар'еры правёў за акіянам. Пачынаў у «Філадэльфія Рэвалюшн» (EJHL), затым выступаў у «Кейп Брэтон Скрымін Іглз» (QMJHL) і «Драмандвіль Валціжэрс» (QMJHL), паведамляе hcdinamo.by.

Паспяхова адыграўшы на маладзёжным узроўні, у 2012 годзе Грабарэнка заключыў кантракт з клубам НХЛ «Нью-Джэрсі», але з ходу трапіць у наймацнейшую лігу планеты ў абаронцы не атрымалася: ён быў адпраўлены набірацца досведу ў АХЛ, у каманду «Албані», у якой, з невялікімі перапынкамі, правёў наступныя чатыры сезоны. Статыстыка Рамана ў АХЛ – 176 матчаў, 21 закінутая шайба, 41 дзейсная перадача.

І ўсё ж у біяграфіі Грабарэнкі ёсць адзін матч у НХЛ! 10 красавіка 2015 года ён выйшаў на лёд у матчы супраць «Тампа» і завяршыў яго з паказчыкам карыснасці «+1».

Мне цяжка было паверыць у тое, што мая мара здзейснілася, і я змог гэтага дамагчыся. Любы гулец марыць гуляць у НХЛ і паказаць усё, на што ён здольны. Цяпер гэта самая моцная ліга на планеце. Узровень хакеістаў у ёй проста фантастычны. Галоўнае — працаваць і, вядома, мець цярпенне.

Аднак праз 4 гады Грабарэнка прымае пастанову растацца з «Нью-Джэрсі» і падпісвае праглядальны кантракт з «Таронта». Але і там у асноўны склад Раману прабіцца не атрымалася.

Цяпер абаронца вярнуўся на радзіму і працягне сваю кар'еру ў наймацнейшым клубе Беларусі — «Дынама-Менск».

Грабарэнка рэгулярна прыцягваўся у юнацкую і моладзевую каманду Беларусі. А з 2012 года — і ў шэрагі нацыянальнай каманды. За яго плячыма — тры чэмпіянаты свету ў складзе галоўнай каманды краіны.

У «Дынама-Менск» абаронца будзе выступаць пад №92.