Скандал: ідэолаг забараніла аддаваць грошы, сабраныя на лячэнне дзіцяці

Непрыгожая гісторыя здарылася ў райцэнтры Дзятлава на Гарадзеншчыне.

Тры месяцы таму тут стартавала акцыя «Ад сэрца да сэрца» для збору сродкаў на лячэнне ў Кітаі трохгадовага Сярожы Мушальскага, хворага дзіцячым цэрэбральным паралічам. Мясцовы цэнтр культуры і народнай творчасці вырашыў арганізаваць серыю дабрачынных канцэртаў, на якія людзі ішлі не дзеля забавы, а каб дапамагчы малому.

Толькі за верасень удалося сабраць 2900 рублёў. Пра гэта шмат пісалі ў мясцовай газеце. Па горадзе былі расклееныя афішы. Артысты пагадзіліся выступаць бясплатна. Атрыманыя грошы меркавалася ўрачыста ўручыць маме хлопчыка на заключным мерапрыемстве 25 снежня. Але ўжо ў кастрычніку стала вядома: акцыя спыненая і нават сабраныя грошы сям'я Мушальскіх не атрымае, піша sb.by.

Мама Сярожы Вольга Мушальская распавяла пра тое, як у яе ўзнікла ідэя папрасіць аб дапамозе работнікаў Дзятлаўскага раённага цэнтра культуры. Незадоўга дагэтуль яна атрымала запрашэнне з кітайскага медыцынскага цэнтра, які ёй рэкамендавалі лекары, з каштарысам 10 тысяч даляраў. Такіх грошай у Мушальскіх не было. Тады ў галаву і прыйшла думка: чаму б не арганізаваць хоць бы адно дабрачыннае мерапрыемства на карысць Сярожы?

— У цэнтры культуры мяне падтрымалі. Пасля таго, як я прынесла дакументы, якія пацвердзілі, што дзіця сур'ёзна хворае, вырашылі правесці серыю выступаў, каб дапамагчы нам са зборам сродкаў. Калі прайшло некалькі канцэртаў, нам сказалі прыйсці і падпісаць дамову, каб пералічыць грошы на наш рахунак. Але неўзабаве аказалася, што атрымаць грошы я не магу. Запатрабавалі дакумент, які пацвярджае, што дзіцяці патрабуецца лячэнне менавіта ў Кітаі. Маўляў, калі яго няма, грошы будуць накіраваныя на іншыя мэты.

...У Дзятлаўскім раённым цэнтры культуры і народнай творчасці журналістаў сустрэлі насцярожаныя супрацоўнікі. Нядаўна ўсе яны — ад выканаўцы абавязку дырэктара Анастасіі Голуб да аўтара праекта «Ад сэрца да сэрца» культурнай арганізатаркі сектара ў рабоце з моладдзю Алы Чарняўскай — самі з натхненнем выступалі на сцэне падчас акцыі для збору сродкаў на лячэнне Сярожы. А цяпер вымушаныя пашкадаваць аб сваім бескарыслівым жаданні дапамагчы:

— Мы сваю працу зрабілі годна, правялі канцэрты на высокім узроўні. У залях былі аншлагі, прыходзілі ад 70 да 200 чалавек. Квіткі куплялі нават тыя, хто дакладна ведаў, што не зможа прыйсці. Людзі вельмі стараліся дапамагчы... Адмашку на спыненне акцыі дала начальніца аддзела ідэалагічнай работы, культуры і спраў моладзі Дзятлаўскага райвыканкама Наталля Калодка. Яна і цяпер перакананая, што іншага выйсця не было:

— Я пачала дасканала вывучаць пытанне пасля таго, як справа дайшла да афармлення дамовы. Дагэтуль прайшло 6 канцэртаў, была сабрана вялікая сума. Але калі мы сталі знаёміцца з усімі дэталямі гэтага працэсу, кансультавацца ў падатковай, юрыстаў, фінансістаў, высветлілася, што для таго, каб накіраваць заробленыя грошы на дабрачынны рахунак Сярожы, трэба заключэнне Міністэрства аховы здароўя аб неабходнасці яго лячэння за мяжой. Такога дакумента ў бацькоў не было.

Тлумачэнні на першы погляд гучаць пераканаўча. Незразумела адно: адкуль раённыя юрысты ўзялі гэтую норму? У прэс–службе Міністэрства аховы здароўя запэўнілі: гэты дзяржаўны орган не мае ніякага дачынення да фармавання пакета дакументаў для дабрачыннага збору і перадачы грошай. Што тычыцца станоўчай пастановы камісіі Міністэрства аховы здароўя для накіравання грамадзян нашай краіны за мяжу для атрымання медыцынскай дапамогі, то яна неабходная толькі ў тых выпадках, калі хворы прэтэндуе на замежнае лячэнне за кошт дзяржаўнага бюджэту.

Аб тым, што для атрымання дабрачынных ахвяраванняў ніякіх даведак ад Міністэрства аховы здароўя не патрабуецца, кажа і дырэктар Гарадзенскага дабрачыннага таварыства Антаніна Місюкевіч:

— Я займаюся дабрачыннасцю больш за 6 гадоў. Не бачу ніякіх прычын не пералічыць заробленыя на канцэртах грошы на разліковы рахунак дзіцяці. Нядаўна мы заключылі дамову з Гарадзенскім гарадскім цэнтрам культуры аб правядзенні аналагічнай акцыі для лячэння хворай дзяўчынкі. Усе атрыманыя сродкі будуць накіраваныя на яе разліковы рахунак. Гэта — легальныя банкаўскія рэквізіты, для атрымання якіх у банку бацькам неабходна было прад'явіць поўны пакет даведак.

Дык чаму ж раённыя кіраўнікі не змаглі знайсці спосаб перадаць суму дабрачыннага збору сям'і Мушальскіх? Бо мне, журналісту, для таго, каб пераканацца ў беспадстаўнасці забаронных аргументаў, спатрэбілася ўсяго два званкі: у Міністэрства аховы здароўя і гарадзенскую дабрачынную арганізацыю...

Вынік гэтай гісторыі такі. Сродкі, збор якіх быў арганізаваны ад яго імя, Сярожа Мушальскі так і не атрымаў. Усе заробленыя грошы накіраваны на набыццё абсталявання для Дзятлаўскага раённага цэнтра карэкцыйна–развівальнага навучання і рэабілітацыі. Спецыяльны столік для дзяцей з сур'ёзнымі парушэннямі здароўя, навучальная тактыльна–акустычная панэль і тры зручныя пуфы, якія прымаюць форму людзей, што ў іх садзяцца ўжо закупленыя. Выканаўца абавязкаў Дзятлаўскага раённага ЦКРНіР Галіна Емяльянчык кажа, што недахоп менавіта гэтых прадметаў у цэнтры адчувалася асабліва востра. Словам, дабрачынныя ахвяраванні не выдаткаваныя марна. Але непрыемны асадак застаўся. І, думаю, не толькі ў сям'і Мушальскіх. У тых, хто хацеў дапамагчы іх дзіцяці, у не меншай ступені...