У брытанскую бібліятэку вярнулі кнігу са спазненнем 120 гадоў

Адміністрацыя бібліятэкі не стала спаганяць штраф з унучкі няўдачлівага чытача.

Якім у вас быў самы доўгі тэрмін утрымання бібліятэчнай кнігі? Калі вы меркавалі сябе рэкардсменам, можа, нават саромеліся свайго ўчынку, пакіньце перажыванні: брытанец Артур Байкат не вяртаў кнігу 120 гадоў.

Яшчэ ў канцы XIX стагоддзя юны чытач узяў са школьнай бібліятэкі тоўсты том пад назвай «Мікраскоп і ягоныя адкрыцці», але так і не вярнуў. Байкат вучыўся ў школе Херэфард з 1886 да 1894 год, пасля выпуску бібліятэкарка яго больш не бачыла, штраф за кожны пратэрмінаваны дзень паступова ператвараўся ў круглую суму, паведамляе BBC.

Праз 120 гадоў кнігу знайшла ўнучка Артура – Аліса Джылет. Яна не паленавалася, у адрозненне ад дзядулі, і вярнула яе ў Херэфард. Адміністрацыя навучальнай установы не стала спаганяць з Алісы штраф за тэрмінам даўнасці падзеі.