Алег Воўчак: Улада сама выштурхоўвае людзей з кухань на Плошчу

Сёння — міжнародны дзень барацьбы супраць рабства.

Роўна год таму праваабаронцы забілі трывогу ў сувязі з тым, што ў краіне ўводзіцца новы падатак на беспрацоўных грамадзян. Як і асцерагаліся экспэрты, дзяржава не змагла наладзіць дыялог з насельніцтвам і растлумачыць, куды пойдуць грошы «дармаедаў».

Кіраўнік праваабарончага цэнтра «Прававая дапамога насельніцтву» Алег Воўчак мяркуе, што трэба неадкладна прыпыніць «барацьбу з дармаедствам», якая толькі злуе народ і рыхтуе людзей да пратэстаў. Сітуацыя яшчэ больш заганяецца ў нявыкрутку, з якой будзе выйсці нерэальна. Аб гэтым Алег Воўчак распавёў «Беларускай праўдзе».

— Актуальнасць дэкрэта №3 за мінулы год страціла падтрымку нават сярод тых, хто спачатку падтрымліваў увядзенне «падатку на дармаедства». За кожным чалавекам, якога абкладаюць новым падаткам, стаяць як мінімум тры чалавекі, якія пацерпяць. А калі ўлічваць усіх ахвяраў, то дэкрэт нанясе ўдар па двух мільёнах чалавек. У 2017 годзе сціжма беспрацоўных можа папоўніцца сотнямі тысяч чалавек.

Праблема не ў грамадзянах, а ў сістэме, якая свае памылкі планавай эканомікі, хоча кампенсаваць за кошт звольненых імі грамадзян.

Усяго чатыры дакументы: дэкрэт і тры пастановы Саўміна — рэгулюе гэтае складанае пытанне. Але няма механізмаў яго рэалізацыі, шмат прававых прабелаў. І няма ніякай інфармацыі аб тым, што грамадзяне маюць права абскардзіць пастановы падатковых органаў. Як і год таму, і цяпер ёсць процьма пытанняў без адказаў наконт працэсу збору падатку, вызначэння статусу грамадзян, якім чынам будзе праходзіць збор інфармацыі дзяржаўнымі органамі і г.д. Падаткавікі працуюць на навобмацак, але не паводле пэўнай методыкі і практыкі.

Апавяшчэнні і паведамленні рассылаюцца без сартавання адрасатаў, г. зн. прыходзяць да «мёртвых» грамадзян, асоб, якія прыйшлі восенню 2015 года з войска, грамадзянаў, якія доўгі час даглядаюць непрацаздольных грамадзян, выпускнікам ВНУ, якіх дзяржава не змагла працаўладкаваць на першае працоўнае месца...

Хутка мінаюць 30 дзён, цягам якіх грамадзяне павінны пералічыць падатак дзяржаве. Ужо цяпер відаць, што людзі настроеныя не плаціць новую прымусовую даніну, такім чынам, студзень будзе «гарачым», бо падатковая будзе абавязана прыцягваць грамадзян да адміністрацыйнай адказнасці за адмову выканаць іх распараджэнні. Людзям пагражае да 15 дзён арышту і прыцягненне да грамадскіх прац цягам тэрміну адбыцця арышту. Ці гатовая дзяржава ўсіх забяспечыць спальнымі месцамі ў цэнтрах ізаляцыі для правапарушальнікаў? Забяспечыць працай, інвентаром, навучыць тэхніцы бяспекі і выконваць шэраг іншых фармальнасцей, каб дапусціць чалавека да працы? Ці выгадна будзе таму прадпрыемству, якое возьме незацікаўленага грамадзяніна, які будзе працаваць на бязвыплатнай аснове? А калі з ім здарыцца вытворчая траўма, то прадпрыемства будзе потым усё жыццё несці адказнасць за такога работніка?

Трэба не забываць, што кожны грамадзянін Беларусі ў адпаведнасці з артыкулам 62 Канстытуцыі Рэспублікі Беларусь мае права на абарону ў судзе. Ці змогуць суды і адвакатура забяспечыць кожнага адвакатам?

Ураду пара прыпыніць гэтую неабгрунтаваную і незаконную кампанію для далейшай галечы народа. Народ пакуль не ідзе на плошчу і не патрабуе змены ўлады, але непрадуманыя дзеянні ўладаў выштурхоўваюць людзей з кухні на вуліцу.

Сёння трэба рассылаць не паведамленні аб выплаце гэтага збору, а лісты для прыходу ва ўправу працы для рэгістрацыі ў якасці беспрацоўнага, каб навучыць людзей новым прафесіям, павысіць іх прафесійную кваліфікацыю, выплаціць нармальную дапамогу з прычыны беспрацоўя, правесці маніторынг рэальнага беспрацоўя і пачаць ствараць новыя працоўныя месцы ў краіне.