«Газпрам цэнтр» у Менску закансервуюць

Прыпыненне будаўніцтва звязанае са зніжэннем даходаў беларускай «дочкі» «Газпрама».

Будаўніцтва «Газпрам-цэнтра» на месцы былога аўтавакзала «Маскоўскі» ў Менску адкладзенае да лепшых часоў. Беларуская «дачка» расейскай газавай манаполіі пачала юрыдычную працэдуру афармлення гэтай пастановы, распавялі tut.by інфармаваныя крыніцы.

Са слоў суразмоўцаў, «Газпрам трансгаз Беларусь» пачынае «працэдуру кансервацыі аб'екта незакончанага будаўніцтва». Пастанова аб кансервацыі прынятая па заканчэнні трох месяцаў з даты прыпынення будаўніцтва «Газпрам-цэнтра». Першая інфармацыя пра гэта з'явілася ў пачатку верасня.

Расейская старана выдала для гэтага «неабходныя грошы», сказаў адзін з суразмоўцаў.

«Калі за мінулы час не ўдалося аднавіць будаўніцтва, то юрыдычная працэдура кансервацыі — гэта лагічны крок, каб не патрапіць пад санкцыі з пункту гледжання нарматыўных тэрмінаў пабудовы аб'екта», — кажа профільны чыноўнік. «Раней яны ў неафіцыйных гутарках казалі аб прыпыненні фінансавання для гэтага аб'екта», — дадаў ён.

Удзельнікі рынка звязваюць прыпыненне будаўніцтва са зніжэннем даходаў беларускай «дочкі» «Газпрама». З маржы «Газпрам трансгаз Беларусь» павінна было фінансавацца будаўніцтва шматфункцыянальнага комплексу.

Менск і Масква ўвесь гэты год вядуць спрэчку аб кошце расейскага газу для Беларусі.

«Газпрам» намагае на 132 далярах за тысячу кубаметраў, Беларусь — на 73 далярах. З апошняй інфармацыі, расейская старана ацэньвае завінавачанасць Беларусі на 300 млн даляраў.

Раней крыніца, блізкая да кампаніі, казала, што прыпыненне будаўніцтва звязанае з карэктаваннем праекту. «Складана ідзе ўзгадненне. Праектаванне прадаўжаецца», — сказаў сёння суразмоўца.

У Менгарвыканкаме пацвердзілі толькі маруднасць у рэалізацыі праекта, але сказалі, што «пастановы аб кансервацыі не паступала».

Ва ўправе для арганізацыі будаўніцтва шматфункцыянальнага комплексу «Газпрам трансгаз Беларусь» адмовіліся ад каментароў.

Нагадаем, будаўніцтва шматфункцыянальнага комплексу «Газпрам цэнтр» пачалося ў 2015 годзе. Аб'ект размесціцца на скрыжаванні вуліцы Філімонава і праспекта Незалежнасці на плошчы 8,27 га на месцы былога аўтавакзала «Маскоўскі». Будучы комплекс будзе ўключаць офісы беларускіх «дочак» «Газпрама», гатэль, паркінг, фізкультурна-аздараўленчы комплекс і медыцынскі цэнтр. Акрамя таго, на тэрыторыі «Газпрам-цэнтра» павінны размясціцца дзіцячы цэнтр развіцця і спадарожныя аб'екты гандлю і паслуг. Заканчэнне будаўніцтва было запланаванае на 2018 год.