Рассельгаснагляд: Беларусы жульнічаюць і труцяць расейцаў

Кіраўнік Рассельгаснагляду абрынуўся на Беларусь.

Добрая палова вялікага інтэрв'ю кіраўніка Федэральнай службы ветэрынарнага і фітасанітарнага нагляду РФ (у свеце Рассельгаснагляду) Сяргея Данкверта РБК прысвечана нашай краіне.

— Беларусь — наш найбліжэйшы партнёр, які вельмі актыўна хоча скарыстацца сітуацыяй, калі расейскі рынак зачынілі для паставак з ЕЗ, і з Украіны. І ён вельмі часта вядзе сябе нядобрасумленна, — заяўляе чыноўнік.

У якасці першага прыкладу беларускіх грахоў Данкверт прыводзіць сітуацыю з мясам:

— У іх кожны год расце колькасць прадпрыемстваў, якія яны атэстуюць на пастаўкі ў Расею. Гэта добра, мы іх віншуем. Але часцяком гэта дробныя РайПО, якія нам вязуць украінскую ялавічыну са зрэзанымі клеймамі. Нам гэтага не трэба. Вы гэта пакіньце для свайго рынку.

Кіраўнік Рассельгаснагляду відавочна прапусціў прэс-канферэнцыю Аляксандра Лукашэнкі, які патлумачыў расейскім журналістам, што Беларусь вырошчвае крэветкі яшчэ з савецкіх часоў, адзначае «Салідарнасць». Данкверт зноў прайшоўся па гэтай тэме:

— Адбываюцца рэчы, якія сталі ўжо намінальнымі, напрыклад, пастаўкі крэветак з Беларусі. Крэветкі, вядома, самае смешнае. Але беларусы яшчэ, напрыклад, вязуць вялікую колькасць яблыкаў. Потым пытаешся: «Як жа вы іх вырасцілі ў такім аб'ёме?» Яны адказваюць: «Не, мы экспартуем іх». Але пачакайце, вы ж пісалі ў дакументах, што гэта ваша вытворчасць? Калі год прайшоў, ужо можна прызнавацца [у рээкспарце], таму што гэта ўсё ў мінулым.

Калі прымаць усё сказанае Данквертам за чыстую манету, то яго ведамству пара заводзіць «Кнігу рэкордаў Рассельгаснагляду»:

— Пастаўкі гародніны і садавіны з Беларусі за тры гады выраслі ў 2,8 разы! Калі за восем месяцаў 2013 года было ўвезена 135,6 тыс. т, то ў студзені—жніўні 2016 года — 441 тыс. т. За два з лішнім гады з увядзеннем эмбарга выяўлена больш за 570 выпадкаў паступлення прадукцыі паводле падробленых фітасанітарных сертыфікатах краіны паходжання.

Шэф гэтай федэральнай службы феерычна абмаляваў тэхналогіі, якія выкарыстоўваюцца кантрабандыстамі:

— У Расеі з Беларуссю няма мяжы як такой. У выніку то ўкраінская прадукцыя едзе, то нібыта бразільская, якая вырабленая ў Нямеччыне або Польшчы на самай справе... Ідзе кантрабанда, пастаўкі прадукцыі пад выглядам «тавараў прыкрыцця». Прыходзяць кантэйнеры з Гамбурга, на іх напісана «бяспечная хімія», «герметык будаўнічы». Адкрываеш — там свіное сала. Зразумела, у калегаў у Еўропе ліберальная сістэма, прыйшлі да мытніка дзе-небудзь у Ротэрдаме або ў Амстэрдаме, курнулі па цыгарэце, адправілі спакойна што трэба.

Але калі галандскіх аматараў траўкі Данкверт успомніў між іншым, то да беларусаў вяртаўся зноў і зноў:

— Прэтэнзій шмат. У тым ліку гэта зноў пытанне паставак з Еўропы. Нядобра перапрацоўваць польскае малако і пастаўляць потым у Расею. Мы прааналізавалі сітуацыю — яны [беларусы] амаль 100 тыс. т малака з Польшчы завезлі да сябе, і гэтыя 100 тыс адразу аўтаматам з гэтага прадпрыемства — прама на Расею. Таму мы сваю актыўнасць па праверкам прадпрыемстваў з Беларусі ўзмацнілі... Толькі за апошні час мы адклікалі 40 дэкларацый на беларускую прадукцыю, таму што яна не адпавядае паказчыкам па тлушчу і бялку. Нашы беларускія калегі не могуць выпускаць прадукцыю з нармальным утрыманнем бялкоў і ў сілу, напэўна, пэўнай прагнасці пачынаюць «хімічыць». Згодна з нашымі даследаваннямі, больш за 40% проб пітнога малака з Беларусі паказала наяўнасць сухога малака. Пры тым што гэта забаронена тэхрэгламентам Мытнага саюза.

Паводле версіі кіраўніка Рассельгаснагляду, беларусы не проста жульнічаюць, але яшчэ і ўціскаюць бедных расейцаў:

— Канкураваць з прадукцыяй з Беларусі складана — яна таннейшая, шмат у чым за кошт таго, што яна сфальсіфікаваная. Вядома, печань і ныркі вытрымліваюць дастаткова доўга, можна якісьці час «не задумвацца». Гэта ж не мыш'яку адразу выпіў, гэта ж малака папіў фальсіфікаванага, нічога страшнага.