Лукашэнка: Дэкрэт аб «дармаедах» вельмі патрэбны і актуальны

Дыктатар заявіў, што скасоўваць дэкрэт ён не збіраецца.

Дэкрэт ад 2 красавіка 2015 года №3 «Аб папярэджанні сацыяльнага ўтрыманства» захаваюць, але ліквідуюць выяўленыя недахопы. Удасканаленне захадаў у гэтай сферы абмяркоўваецца сёння на нарадзе ў Лукашэнкі, паведамляе БелТА.

Дыктатар адзначыў, што ў народзе адпаведны дакумент назвалі дэкрэтам супраць гультаёў. «Напэўна, у гэтым нешта ёсць. Не будзем спрачацца з народам, - сказаў ён. - Дэкрэт быў накіраваны на ліквідацыю вельмі складанай праблемы - сацыяльнага ўтрыманства. Развязанне гэтай праблемы бачылася ў стымуляванні працаздольных грамадзян, якія могуць і павінны працаваць, да легальнай працоўнай дзейнасці і забеспячэння выканання канстытуцыйнага абавязку ва ўдзеле ў фінансаванні дзяржвыдаткаў».

Лукашэнка нагадаў аб даручэнні старанна маніторыць ужыванне дэкрэта на практыцы і працэсы ў гэтай сферы. «Былі прапановы ледзь не адмовіцца ад гэтага дэкрэта: шмат крытыкі, цяжка адміністраваць і многія іншыя пытанні», - канстатаваў дыктатар.

Адпаведная тэматыка неаднаразова абмяркоўвалася падчас дакладаў дыктатару Марыяны Шчоткінай, якая раней займала пасаду міністра працы і сацыяльнай абароны Беларусі. «Тады я сказаў, што якія б ні былі размовы, для таго, каб прымаць дадатковую пастанову, трэба пажыць, папрацаваць. Прайшло больш за год. Мы цяпер ужо больш-менш бачым, што даў гэты дэкрэт, якія станоўчыя бакі гэтага дакумента. Недахопы ёсць? Ну што ж, давайце папраўляць», - заявіў Лукашэнка.

Дыктатар падкрэсліў, што ў гэтым пытанні яго больш за ўсё турбуе нават не тое, што грамадзяне, якія падпадаюць пад нормы дэкрэта, атрымліваюць пэўнае бясплатнае абслугоўванне або льготы. «Мяне больш за ўсё хвалюе рэакцыя людзей на гультаёў. Чалавек, які можа працаваць, не інвалід, не абмежаваны ў нейкіх здольнасцях і магчымасцях, ён павінен працаваць, зарабляць на сябе і сваю сям'ю і прыносіць карысць краіне, выплачваючы падаткі», - сказаў Лукашэнка.

Ён прапанаваў разабрацца, якія праблемы паўсталі падчас рэалізацыі дэкрэта, наколькі надзейна пастаўлены заслон сацыяльнаму ўтрыманству, ці ўздзейнічае распрацаваны механізм на тых людзей, якія не хочуць працаваць або працуюць нелегальна. Лукашэнка таксама пацікавіўся, якая рэальная практыка ўжывання дэкрэта на месцах, наколькі якасна і дакладна складаюцца спісы плацельшчыкаў гэтага збору.

«Мне дакладваюць, што нярэдка паведамленні на выплату збору паступаюць ад падатковых інспекцый грамадзянам, якія не абавязаныя плаціць гэты збор і не павінны былі ўключацца дзяржаўнымі органамі ў спісы плацельшчыкаў: студэнтам, жанчынам, якія знаходзяцца ў дэкрэтных адпачынках, нават жаўнерам тэрміновай службы», - заўважыў дыктатар.

«У гэтай сітуацыі заўсёды будуць нейкія недахопы. Галоўнае, каб мы бачылі гэтыя недахопы і своечасова іх ліквідавалі», - падкрэсліў Лукашэнка.

Правадыр таксама запатрабаваў далажыць аб выніках выканання ўрадам даручэння аб стварэнні дастатковай колькасці працоўных месцаў для працаўладкавання беспрацоўных грамадзян і выніках маніторынгу ўзроўню беспрацоўя ва ўсіх рэгіёнах рэспублікі.

Як далажыла віцэ-прэм'ер Наталля Качанава, урадам ва ўзаемадзеянні з адміністрацыяй Лукашэнкі праведзены маніторынг рэалізацыі дэкрэта. Галоўная выснова - дэкрэт з'яўляецца актуальным, аб'ектыўным і неабходным, робіць станоўчае ўздзеянне на сферу працы і занятасці, уцягванне ў легальную эканамічную дзейнасць незанятага насельніцтва.