Беларус атрымаў з ЗША «ліст шчасця» з $5 тысячамі

Але на шляху да шчасця ўсталі «доблесныя» менскія мытнікі.

Пры даглядзе паштовых адпраўленняў супрацоўнікі Менскай рэгіянальнай мытні выявілі ў адным з іх 5 тысяч даляраў. Для перасылкі грошай быў абраны не той тып адпраўлення, грошы канфіскавалі да пастановы суда. Падрабязнасці паведамляе Мытны камітэт Беларусі.

У адным з лістоў на імя беларуса супрацоўнікі мытні знайшлі незадэклараваную валюту - усяго 5 тысяч даляраў купюрамі па сотні. Ліст прыйшоў з ЗША.

Хоць адпраўнік у дэкларацыі ўказаў, што перамяшчаюцца дакументы.

Прыгледзецца наважылі больш уважліва, калі падчас рэнтгеналагічнага сканавання ўбачылі нешта іншае - паштоўку і ўкладанне.

«У адпаведнасці з Пастановай Савета Міністраў «Аб зацвярджэнні Правілаў надання паслуг паштовай сувязі», замежная валюта можа перасылацца толькі ў лістах з абвешчанай каштоўнасцю і, адпаведна, забароненая да перасылкi ў іншых тыпах міжнародных паштовых адпраўленняў», - растлумачылі ў Менскай рэгіянальнай мытні.

Таму валюта была канфіскаваная да выраку суда.