Кіраўнік Еўрапарламента Шульц зраўняўся ў папулярнасці з Мэркель

Дзейнасць палітыка станоўча ацэньваюць 57 адсоткаў апытаных грамадзян ФРГ.

У Нямеччыне вырас рэйтынг старшыні Еўрапарламента Марціна Шульца, якога рыхтуюць на пасаду будучага міністра замежных спраў і называюць магчымым кандыдатам на пасаду канцлера Нямеччыны ад Сацыял-дэмакратычнай партыі (SPD).

Пра гэта сведчаць звесткі апытання ARD-Deutschlandtrend, якія былі апублікаваныя ўвечары 8 снежня, паведамляе «Немецкая волна».

Дзейнасць палітыка станоўча ацэньваюць 57 адсоткаў апытаных грамадзян ФРГ, што на 7 адсоткавых пунктаў перавысіла вынік папярэдняга аналагічнага апытання. Гэта дазволіла Шульцу заняць трэцяе месца ў спісе самых папулярных палітыкаў паводле версіі рэспандэнтаў ARD разам з Ангелай Мэркель (Angela Merkel). Палітычнай дзейнасцю канцлеркі Нямеччыны таксама задаволены 57 адсоткаў рэспандэнтаў. У параўнанні з папярэднім месяцам, папулярнасць Мэркель вырасла на 5 адсоткавых пунктаў.

У рэспандэнтаў таксама спыталі, якую з гэтых двух кандыдатур яны падтрымалі б на выбарах. Цяперашняга кіраўніка ўрада ФРГ выбралі б 43 адсоткі апытаных, у той час як 36 адсоткаў аддалі б свае галасы за дзейнага старшыню Еўрапарламента.

Штайнмаер - самы любімы палітык

Паводле вынікаў апытання ARD-Deutschlandtrend, найбольш папулярным нямецкім палітыкам стаў міністр замежных спраў Франк-Вальтэр Штайнмаер (Frank-Walter Steinmeier). Ён заручыўся падтрымкай 79 адсоткаў рэспандэнтаў, а яго рэйтынг вырас на 7 працэнтных пунктаў, што з'яўляецца самым высокім паказчыкам для палітыка ў гэтым апытанні. Больш таго, 82 адсоткі апытаных немцаў лічаць Штайнмаера прыдатным кандыдатам на пасаду прэзідэнта краіны.

На другім радку рэйтынгу папулярнасці размясціўся кіраўнік Міністэрства фінансаў Нямеччыны Вольфганг Шойбле (Wolfgang Schäuble) з 66 адсоткамі галасоў. Самай папулярнай партыяй застаецца кіруючы блок ХДС/ХСС. Яму аддалі перавагу 35 адсоткаў апытаных. За ім ідзе СДПН (22 адсоткі) і правапапулісцская «Альтэрнатыва для Нямеччыны» (13 адсоткаў).

Выбары ў бундэстаг, па выніках якіх вырашыцца, хто зойме пасаду канцлера, пройдуць у Германіі ў канцы верасня 2017 года.