Януковіч атрымаў часовы прытулак у Расеі да 1 лістапада 2017 года
9- 9.12.2016, 16:09
- 23,004
Генеральная пракуратура Украіны атрымала афіцыйнае апавяшчэнне аб статусе збеглага экс-прэзідэнта ў РФ.
Адпаведны дакумент, копіяй якога валодае РБК-Украiна, адвакат Януковіча Віталь Сярдзюк накіраваў у Генеральную пракуратуру разам з заявай аб адмове прыняць падазрэнне ў здрадзе.
Згодна з дакументам, Віктар Януковіч атрымаў пасведчанне аб наданні часовага прытулку на тэрыторыі Расейскай Федэрацыі. Яно было выдадзенае экс-прэзідэнту УФМС Расеі ў Растоўскай вобласці 26 лістапада 2015 года на адзін год.
Пазней тэрмін яго дзеяння быў падоўжаны яшчэ на год - да лістапада 2017 года. Як гаворыцца ў пасведчанні, Віктар Януковіч пастаўлены на ўлік у Савецкім раёне Растова-на-Доне.
«Пасведчанне аб наданні часовага прытулку з'яўляецца дакументам, які сведчыць асобу яго ўладальніка, і пацвярджае законнасць знаходжання гэтай асобы на тэрыторыі Расейскай Федэрацыі, - сказана ў дакуменце. - Асоба, якая атрымала часовы прытулак, не можа быць вернутая супраць ягонай волі на тэрыторыю дзяржавы сваёй грамадзянскай прыналежнасці (свайго ранейшага звычайнага месца жыхарства)».