Беларуса, які прыехаў у РФ за аўтамабілем, забілі кувалдай

Цела забітага прадавец аўто закапаў на закінутых могілках у горадзе Камышын Валгаградскай вобласці РФ.

У пачатку гэтага тыдня расейскія праваахоўнікі выявілі цела невядомага мужчыны, смерць якога наступіла ў выніку чэрапна-мазгавой траўмы. Паводле факта была распачатая крымінальная справа ў прыкметах забойства. Праз некаторы час знайшлі падазраванага - да мясцовага жыхара прыехаў беларус, каб купіць у яго аўтамабіль. Паводле звестак СК Валгаградскай вобласці, расеец пайшоў на злачынства дзеля грошай, якія былі ў пакупніка з сабой.

«Цягам сутак удалося ўстанавіць асобу забітага - ім апынуўся 54-гадовы грамадзянін Рэспублікі Беларусь, - паведамілі следчыя. - Знайшлі і падазраванага, ён быў затрыманы. Цяпер развязваецца пытанне аб абранні ў дачыненні да яго меры стрымання ў выглядзе ўзяцця пад варту. Сваю віну ў зробленым мужчына цалкам прызнаў».

З паказанняў расейца і вынікаў следства сталі вядомыя абставіны злачынства: «У пачатку года 29-гадовы мясцовы жыхар у сетцы размясціў аб'яву аб продажы аўтамабіля. Прэстыжнай мадэллю зацікавіўся жыхар Беларусі, які 7 лютага 2016 году асабіста прыбыў у горад Камышын для ўкладання ўгоды. Прадавец і пакупнік сустрэліся ў гаражным боксе, які падазраваны арандаваў для рамонту аўтамабіляў. Зламыснік пэўна ведаў, што ў пакупніка пры сабе знаходзіцца буйная сума грошай. У нейкі момант ён схапіў кувалду і нанёс ёю некалькі ўдараў па галаве мужчыны. Выкраўшы грошы, падазраваны вывез цела забітага на аўтамабілі аднаго з сваіх кліентаў і схаваў на тэрыторыі закінутых могілак».

Паводле звестак СК, у гэты ж дзень зламыснік стаў марнаваць скрадзеныя ім грашовыя сродкі - аплаціў камунальныя плацяжы і крэдытныя абавязанні, выкупіў сваю маёмасць у ламбардзе.