У Беларусі могуць змяніць механізм распачынання крымінальных спраў

Пытанне будзе абмяркоўвацца з кіраўнікамі ўстаноў сілавога блоку ў траўні-чэрвені 2016 года.

Пра гэта Аляксандр Лукашэнка заявіў сёння на пашыраным пасяджэнні калегіі Следчага камітэта паводле вынікаў працы за 2015 год, паведамляе БелТА.

«Галоўнае пытанне тут у тым, ці нам гэта трэба? Ці будзе карысць? Калі гэта кардынальная пастанова, ну так пойдзем і на кардынальную. Галоўнае, каб мы былі перакананыя, што гэта трэба, карысна і дасць станоўчы эфект», - заявіў Лукашэнка.

«Пасля вывучэння фактаў збяромся і прымем пастанову або адхілім яе і наогул да гэтага вяртацца не будзем», - сказаў дыктатар. Пры гэтым Аляксандр Лукашэнка звярнуў увагу, што людзі, як правіла, не прыходзяць проста так у міліцыю з заявай.

«У асноўным чалавек прыходзіць са сваёй праблемай і болем і прыносіць заяву. І адфутбольваць нельга. Можа быць, вызначыцца, што, калі ў заяве факт не варты выедзенага яйка, то на стадыі дазнання трэба неяк чалавеку адказаць, разгледзець заяву, не распачынаючы крымінальнай справы», - мяркуе Лукашэнка.

Ён дадаў, што можна сказаць чалавеку, што крымінальная справа распачынацца не будзе.

«Але нейкім чынам задаволіць ягоную просьбу, пачынаючы проста ад дыялогу з ім, заканчваючы ўжытымі захадамі на стадыі дазнання. Дзе трэба пачынаць крымінальную справу, дазнаўца павінен ставіць вельмі жорстка пытанне перад следчым», - мяркуе правадыр. Аляксандр Лукашэнка падкрэсліў, што крытэрыі ацэнкі работы следчых не павінны быць вузкаведамасныя.