Прэзідэнту Літвы даслалі канверт з невядомым парашком

Расследаваннем інцыдэнту займаецца літоўскі Дэпартамент аховы кіраўніцтва.

У рэзідэнцыю прэзідэнта Літвы Далі Грыбаўскайтэ даслалі канверт з невядомым парашком, паведамляе Delfi.lt.

На месца выклікалі службу аховы, якая даследуе змесціва пасылкі. Са словаў работнікаў, эвакуяваць людзей не сталі, аднак супрацоўнікам Дэпартамента аховы кіраўніцтва, якія ахоўваюць некаторыя пераходы, забаронена карыстацца ліфтамі.

Пасылка была атрыманая раніцай. Яе даставілі ў тую частку прэзідэнцкага палаца, дзе знаходзіцца канцылярыя.

Віленская паліцыя пра інцыдэнт даведалася з СМІ. Яго расследаваннем займаецца Дэпартамент аховы кіраўніцтва.

«Аддзел кіравання дакументамі прэзідэнцкай канцылярыі атрымаў канверт са змесцівам невыразнага паходжання. Дэпартамент аховы здароўя выключыў канверт для далейшага расследавання і перадаў адказным установам. Праца прэзідэнцкай канцылярыі не парушаная», - сказана ў інфармацыі прэс-службы прэзідэнта.

Раней сайт charter97.org паведамляў, што ў студзені французскі прэм'ер Мануэль Вальс атрымаў канверт з белым парашком.