Бязмытныя ліміты на пасылкі: у Расеі – 1 000 €, Малдове - 300€, Грузіі - 125€
14- 12.02.2016, 21:06
- 27,275
У Беларусі ў красавіку ўвядуць новыя ліміты на атрыманне міжнародных адпраўленняў.
Цяпер тыя, мытны кошт якіх перасягае 22 еўры, а вага - 10 кг, будуць абкладацца падаткам 30% (але не менш за 4 еўры за кг). Раней абмежаванне складала 200 еўра і 31 кг, нагадвае udf.by.
Якія ліміты на бязмытнае атрыманне міжнародных пасылак у нашых суседзяў?
Ва Украіне мыта не накладаецца на пасылкі з-за мяжы, якія каштуюць менш за 150 еўраў. Цікава, што колькасць такіх пасылак можа быць неабмежаванай. У выпадку перавышэння ліміту і вагі мыта разлічваецца 10% + ПДВ на кошт перавышэння.
У Расеі падаткам не абкладаецца пасылка, якая прыходзіць з-за мяжы на адзін адрас раз на месяц, яе агульны кошт павінен быць менш за 1 000 еўра, а вага - менш за 31 кг. Пры перавышэнні гэтых лімітаў трэба будзе заплаціць 30% мыты ад сумы перавышэння, але не менш за 4 еўры за кг.
Для жыхароў Літвы, Польшчы і Латвіі бязмытныя ліміты на замежныя камерцыйныя пасылкі - 22 еўры.
"Да 22 еўраў аплат няма, калі ў гэтай пасылцы няма акцызнага тавару. Гэта не толькі тытунёвыя вырабы, алкаголь і парфумерныя вырабы", - кажа прадстаўніца літоўскай мытні.
Для прыватных пасылак (ад адной фізічнай асобы іншай) кошт крыху вышэйшы - 45 еўраў. Калі кошт паштовага адпраўлення большы, ён будзе абкладацца падаткам на дададзеную вартасць (ПДВ). У Літве, напрыклад, ён роўны 21%.
Распавядае прадстаўніца польскага мытнага камітэта:
"Калі пасылка ацэньваецца менш як 150 еўраў, яна вызваляецца ад мытнага падатку, але на яе ўсё адно накладаецца ПДВ. У Польшчы ён роўны 23%".
Калі кошт пасылкі перасягае 150 еўраў, да ПДВ дадаецца яшчэ і ўвазная мыта, а таксама расходы мытных пасярэднікаў або паштовых дэкларантаў. У Літве гэтая мыта роўная 2,5%, у Польшчы залежыць ад катэгорыі тавару - ад 3% да 8%.
У нашых суседзяў з Еўразвязу няма абмежаванняў у вазе і колькасці паштовых адпраўленняў.