Экс-пракурор Архіпаў: Пра калонію нічога не памятаю, суму заробку не ведаю, наперадзе пасяўная
41- 2.02.2016, 11:09
- 29,658
Былога намесніка генпракурора Беларусі Аляксандра Архіпава пасля датэрміновага выхаду з калоніі нечакана кінулі «падымаць» гаспадарку ў Смалявіцкім раёне.
«Чаго вы зацікавіліся мной? Мной не трэба цікавіцца, я працую і ўсё», - так спачатку адрэагаваў былы намеснік генпракурора Аляксандр Архіпаў на званок журналіста «Радыё Свабоды».
— Як справы ў гаспадарцы, якую вы ўзначалілі? Прачытаў на сайце сельгасуправы Смалявіцкага раёну, што там ў вас вакансія галоўнага агранома ды іншыя. Знайшлі ўжо чалавека?
— Усе спецыялісты на месцы, і галоўны аграном — усе. Не ведаю, у вас, пэўна, недакладная інфармацыя. А што ёсць, дык гэта раздутыя кадры, якія непатрэбныя нам. А так тут нармальная гаспадарка, добрыя працаўнікі, усё круціцца-верціцца.
— І якая ў вас галоўная задача цяпер? Чым найперш збіраецеся ў гаспадарцы заняцца?
— У нас наперадзе пасяўная. Галоўнае своечасова пасеяць і сабраць ураджай. Накарміць жывёлу і атрымаць малачко і мяса.
— А які ў вас будзе заробак, калі можна пра гэта даведацца?
— Не ведаю. Я працую без году тыдзень і што, я мушу цікавіцца заробкам? Але мяркую, як ва ўсіх калгаснікаў, гэтак і ў мяне — ні больш ні менш. А з улікам гаспадаркі, дык можа і меншы заробак, чым у суседзяў.
— Дык усё ж вам дасталася моцная гаспадарка, сярэдняя ці слабенькая?
— Мне цяжка пакуль адказаць, паглядзім. Я ж не ведаю патэнцыялу людзей. Пакуль усе працуюць добра, стараюцца. А за два дні разабрацца цяжка.
— Але ж вы не адмысловец у сельскай гаспадарцы, вы ж юрыст. Як вы будзеце разбірацца?
— Ну і што? Я прывяду вам сотні прыкладаў, калі не адмыслоўцы ў сельскай гаспадарцы сёння ўзначальваюць сельскагаспадарчыя прадпрыемствы. Паспяховыя і багатыя людзі, з Беларусі. А я большасць жыцця працаваў на раёне, на зямлі. І ведаю, што адбываецца ў сельскай гаспадарцы не на слых.
На пытанне наконт калоніі, у якой яму давялося адбываць пакаранне, новы дырэктар гаспадаркі «Пятровічы» адказваць асабліва не жадаў:
— Нічога жахлівага са мной не было, гэта такі жыццёвы шлях. Але досыць пра гэта. У мяне там было нармальнае жыццё, як у іншых. Нават працаваў там. А ў якой калоніі я быў, дык ужо і забыўся. Навошта мне памятаць? У мяне цяпер новае жыццё. Працаваць на новай працы на карысць нашай радзімы.
— Якую мэту вы ставіце перад сабой? Вярнуцца ў выніку ў пракуратуру ці прысвяціць сябе гаспадарчай дзейнасці?
— Не, буду займацца сельскай гаспадаркай. Мне не гэтак мала гадоў, што яшчэ магу нечым заняцца іншым, я сваё ўжо адхадзіў. Паўтараю, што буду працаваць на карысць сваёй краіны.
— Гэта добра. Але ў вас ёсць мэта заслужыць давер, вярнуць сваё чэснае імя?
— А яно ў мяне засталося чэсным, як і было. І застанецца.
— Але ж суд вас прызнаў вінаватым у злачынстве, у тым ліку ў атрыманні хабару.
— Гэта вам падаецца, што... Насамрэч самы галоўны суддзя для мяне гэта я сам. Калі я ведаю, што я прыстойны чалавек, дык і ўсе іншыя гэта ведаюць, а што там пішуць...
— Ці ёсць у вас крыўда на Аляксандра Лукашэнку? Ён мог бы вас і не саджаць за краты, а абмежавацца звальненнем.
— Не, я гэтага чалавека паважаў і буду паважаць. Ды і пры чым тут Лукашэнка? Не ён даваў загад мяне асудзіць, гэта поўнае трызненне. А тое, што ён пра мяне казаў — што з таго? Такую інфармацыю яму паклалі на стол. Наадварот, Аляксандр Рыгоравіч быў аб’ектыўным ва ўсіх учынках адносна мяне. Таму ніякіх крыўдаў у мяне няма, ні на каго. Калі хто быў вінаваты ў маёй сітуацыі, дык вінаваты я сам.
— На Уладзіміра Канаплёва таксама не крыўдуеце? Гэта ж ён вас уцягнуў у тую гісторыю.
— Паўтараю, ні на каго не крыўдую. Пытанняў ні да каго няма. У мяне і ў сям’і засталося ўсё добра. Там у мяне таксама ўсе людзі моцныя, якія любяць Беларусь і будуць на яе працаваць.
Паводле звестак з Пракуратуры Беларусі,Аляксандр Архіпаў вызваліўся на падставе памілавання, якое падпісаў Аляксандр Лукашэнка. Адбываў пакаранне Аляксандр Архіпаў, паводле крыніцы ў Дэпартаменце пакаранняў МУС, у віцебскай калоніі «Віцьба-3», дзе адбываюць тэрміны шмат якія высокапастаўленыя чыноўнікі Беларусі, асуджаныя за карупцыю.
Былы генпракурор Беларусі летась быў асуджаны на 6 гадоў пазбаўлення волі ў калоніі ўзмоцненага рэжыму і да канфіскацыі маёмасці за атрыманне хабару і перавышэнне службовых паўнамоцтваў. Паводле выраку суду, Аляксандр Архіпаў дапамог пазбегнуць адказнасці кіроўцу, які збіў чалавека. За гэта былы намеснік генпракурора атрымаў злітак золата і бутэльку дарагога каньяку. Разам з ім быў асуджаны былы старшыня Палаты прадстаўнікоў Нацыянальнага сходу Уладзімір Канаплёў, якога суд прызнаў вінаватым ў неданясенні аб злачынстве і аштрафаваў на 135 мільёнаў рублёў. Суд над Аляксандрам Архіпавым і Уладзімірам Канаплёвым быў закрытым.