У выхадныя будзе па-вясноваму цёпла

Невялікае пахаладанне, якое адбылося ў канцы тыдня, трохі паменшыла станоўчую тэмпературную анамалію.

Калі ў сярэдзіне тыдня сярэдняя сутачная тэмпература перавышала норму на 10-13°С, то ў апошнія працоўныя дні анамалія склала 7-10°С, а ў нядзелю больш цёплыя паветраныя масы, якія паступаюць з паўднёвага захаду Еўропы, зноў прынясуць пацяпленне. Пра гэта tut.by расказаў начальнік службы гідраметэаралагічных прагнозаў Рэспубліканскага гідраметцэнтра Дзмітрый Рабаў.

У суботу, 6 лютага, варункі надвор'я на тэрыторыі Беларусі будзе вызначаць вільготная паветраная маса, якая паступае з Балтыйскага мора, удзень на захадзе краіны адаб'ецца ўплыў малаактыўнага атмасфернага фронту. Месцамі чакаецца невялікі снег, удзень у заходніх раёнах будзе пераходзіць у дождж. Уначы і раніцай у асобных раёнах слабыя туман і галалёд, на дарогах месцамі галалёдзіца. Тэмпература паветра мінімальная ўночы -1, -6°С, пры прасвятленнях да -8°С, максімальная ўдзень 0, + 6°С.

У Менску - воблачна з прасвятленнямі. Уначы магчымы невялікі снег, удзень без істотных ападкаў. На дарогах месцамі галалёдзіца. Вецер заходні, паўднёва-заходні 5-10 м/с. Тэмпература паветра мінімальная ўначы -2, -4°С, максімальная ўдзень +2, + 4°С.

У нядзелю, 7 лютага, пераважна без ападкаў, толькі ўначы месцамі на поўначы невялікія ападкі (дождж, мокры снег). Уначы і раніцай на асобных адцінках дарог галалёдзіца. Тэмпература паветра мінімальная ўначы -4, + 3°С, максімальная ўдзень +2, + 7°С, на паўднёвым захадзе +8, + 10°С.

У Менску - без істотных ападкаў, воблачна з прасвятленнямі. На дарогах месцамі галалёдзіца. Вецер заходні, паўднёва-заходні 5-10 м/с. Тэмпература паветра мінімальная ўначы - блізу 0°C, максімальная ўдзень +3, + 5°С.

У панядзелак, з 8 лютага, захаваецца цёплае надвор'е: тэрыторыя Беларусі будзе знаходзіцца пад уплывам атмасферных франтоў і паветраных мас, якія змяшчаюцца з паўднёвага захаду Еўропы. Уначы пераважна без ападкаў, удзень месцамі, у асноўным на захадзе, кароткачасовыя ападкі з перавагай дажджу. Уначы і раніцай на асобных адцінках дарог галалёдзіца. Тэмпература паветра мінімальная ўначы -2, + 4°С, максімальная ўдзень +2, + 8°С, на паўднёвым захадзе +9, + 10°С.

Сіноптыкі таксама папярэджваюць, што выходзіць на лёд вельмі небяспечна. На гэты час практычна ачысціліся ад ледзяных утварэнняў асобныя адцінкі Нёмана, Віліі, Заходняга Буга, Бярэзіны, Прыпяці і некаторыя іх прытокі. На астатніх рэках яшчэ захоўваецца ледастаў, у асноўным з палонкамі, закраінамі і разводдзямі. На вадаёмах назіраецца суцэльнае ледзяное покрыва, лёд растае на месцы, з’яўляецца вада на лёдзе. Таўшчыня ледзянога покрыва на рэках складае 11-26 см, на вадаёмах - 18-29 см, выходзіць на лёд вельмі небяспечна. У найбліжэйшыя дні падвышэнне ўзроўняў вады на рэках захаваецца, будзе адбывацца далейшае разбурэнне ледзянога покрыва.