Спартыўны чыноўнік Менгарвыканкама браў гатоўку за арэнду спартзала

Чыноўнік затрыманы Следчым камітэтам.

Следчы камітэт скончыў папярэдняе следства ў крымінальнай справе ў дачыненні да былога дырэктара ДУ «Менскі гарадскі цэнтр фізічнага выхавання і спорту вучнёўскай моладзі» камітэта адукацыі Менгарвыканкама.

Як паведаміла прэс-служба СК, падчас расследавання ўстаноўлена, што 56-гадовы мянчук, са студзеня 2015 да лютага 2016 года займаючы пасаду дырэктара, неаднаразова даваў указанні падначаленым аб перадачы яму наяўных грошай за карыстанне грамадзянамі спартыўнай заляй установы без афармлення дамоў арэнды і ўнясення на рахунак цэнтра аплаты за аказаныя паслугі. За названы перыяд дырэктар дзяржаўнай установы атрымаў грашовыя сродкі ў агульнай суме больш за 48 мільёнаў рублёў ад шасці арандатараў і распарадзіўся імі на сваё меркаванне.

Акрамя таго, службовая асоба, з'яўляючыся старшынёй камісіі ў правядзенні тэндэру ў выбары падрадчыка на выкананне будаўнічых работ у рамонце адміністрацыйнага будынка ўстановы, зыходзячы з карыслівых інтарэсаў, рабіў замах на атрыманне для сябе незаконнай узнагароды. У выніку службовая асоба прыняла ў якасці хабару грашовыя сродкі сумаю 30 млн рублёў ад дырэктара камерцыйнай фірмы за станоўчае развязанне пытання аб прызнанні яго пераможцам у гэтай працэдуры.

Падчас следства забяспечаная выплата шкоды шляхам накладання арышту на маёмасць абвінавачанага на агульную суму больш за 200 мільёнаў рублёў.

На падставе сабраных довадаў былому дырэктару дзяржаўнай установы ставіцца замах на атрыманне хабару і крадзеж шляхам злоўжывання службовымі паўнамоцтвамі. Да абвінавачанага прымененая мера стрымання ў выглядзе ўзяцця пад варту. Крымінальная справа перададзеная ў пракуратуру для накіравання ў суд.