Кіроўца: BelToll ужо бярэ грошы і за праезд па «бясплатных» дарогах

Аўтамабіліст аб'ехаў адцінак платнай дарогі іншым шляхам, але BelToll усё адно зняў з яго аплату.

Кіроўца грузавога аўтамабіля распавёў, што нядаўна ездзіў з Менска ў аэрапорт, а на зваротным шляху, каб трохі зэканоміць, зрэзаў адзін з адцінкаў платнай дарогі, праехаўшы іншым маршрутам. Зэканоміць не атрымалася: кошт выставілі такі, быццам ён нікуды і не збочваў, а праехаў увесь маршрут платным адрэзкам трасы, піша onliner.by.

- Не так даўно ездзіў у Нацыянальны аэрапорт «Мінск», у мяне грузавая машына. З’ездзіў туды, а на зваротным шляху наважыў аб'ехаць платны адрэзак трасы паралельнай дарогай, - распавёў кіроўца.

Ён звярнуў з трасы М2 (Менск - Нацыянальны аэрапорт «Мінск») на Смольніцу, праехаў Волму і Сокал, а затым выехаў на М1 (Берасце - Менск - мяжа Расеі).

- Праз пару дзён наважыў праверыць раздрукоўку. І выявілася, што спісалі грошы і за той адцінак дарогі, які я аб'язджаў! - Абураны кіроўца.

- Я стаў тэлефанаваць, напісаў скаргу. У ёй я адзначыў, што рухаўся дарогай у аэрапорт маршрутам М4 - М1 - М2 праз разліковыя сегменты №47, 26, 41. А зваротны шлях прарабіў маршрутам М2 - Н9531 - М1 - М4, праз разліковыя сегменты №41, 47. І выязджаў на М1 я ў раёне пасёлка Сокал, каля запраўкі «Беларуснафты». Адпаведна, праз разліковы сегмент №1026 я не праязджаў. Чаму ж за яго былі спісаныя грошы?

Сітуацыю пракаментавалі ў BelToll. Там адзначылі, што ў адпаведнасці з пунктам 45 Палажэння аб парадку збірання платы за праезд транспартных сродкаў на платных аўтамабільных дарогах Рэспублікі Беларусь, зацверджанага пастановай Савета Міністраў Рэспублікі Беларусь ад 2013/04/30 №340, абавязанне для ўнясення платы за праезд па разліковым сегменту ўзнікае з моманту выезду транспартнага сродку на праезную частку платнай дарогі гэтага разліковага сегмента.

- Карыстальнік на праязджаў пад станцыяй збору платы, але заязджаў і рухаўся па разліковым сегменту платнай дарогі, што пацвярджаецца як заявай самога карыстальніка, які кажа, што праязджаў Сокал, так і вынікамі аналізу і супастаўлення інфармацыі, атрыманай ад станцый збору платы, размешчаных на папярэдніх і наступных разліковых сегментах. Такая інфармацыя, у адпаведнасці з пунктам 45 Палажэння, з'яўляецца дастатковым довадам факту карыстання платнай дарогай карыстальнікам платнай дарогі, - растлумачылі ў BelToll.

Таксама там падкрэслілі, што абавязанне для аплаты ўзнікае не ў момант праезду пад станцыяй, а з моманту ўезду на платны адцінак дарогі.