Сталі вядомыя падрабязнасці жыцця падпаліўшага сябе на Кастрычніцкай плошчы мужчыны

Мужчына доўгі час змагаўся за права браць большы ўдзел у выхаванні свайго сына.

Пра гэта паведамілі БелТА ў праваахоўных органах Беларусі.

Ураджэнец вёскі Мялешкавічы Мазырскага раёна Гомельскай вобласці 1959 года нараджэння пражываў у Калодзішчах Менскага раёна. Ён быў жанаты, у 2007 годзе ў яго нарадзіўся сын. Сямейная ідылія доўжылася нядоўга: у кастрычніку 2010 года муж і жонка развяліся, а дзіця засталося з маці.

Суд устанавіў парадак дачыненняў бацькі з сынам, аднак у снежні 2011 года ён быў зменены. Да дасягнення дзіцем сямігадовага ўзросту мужчыну дазволілі бачыцца з сынам толькі ў прысутнасці маці. Ён спрабаваў абскардзіць гэта ў судзе, але ўсё было безвынікова. Калі дзіцяці споўнілася сем гадоў, былая жонка зноў звярнулася ў суд з патрабаваннем абмежаваць стасункі бацькі з сынам.

Яна матывавала гэта тым, што адказчык вядзе сябе не годна, напрыклад, тройчы прыходзіў да дзіцяці п'яным і даваў сыну прадукты, ужываць якія забаранілі хлопчыку лекары. Жанчына прасіла падоўжыць парадак стасункаў дзіцяці з экс-мужам у яе прысутнасці да дасягнення хлопчыкам дзесяцігадовага ўзросту. У сваю чаргу мужчына скардзіўся, што былая жонка забараняе яму бачыць сына.

У выніку суд адмовіў жанчыне ў задавальненні патрабаванняў аб абмежаванні права былога мужа на стасункі з дзіцем. Патрабаванні мужчыны суд задаволіў часткова і вызначыў канкрэтны парадак удзелу бацькі ў выхаванні дзіцяці.

Цяпер мужчына меў права бачыцца з сынам у другую суботу кожнага месяца з 11.00 да 13.00 у сацыяльна-педагагічным цэнтры Першамайскага раёна Менска ў прысутнасці педагога-псіхолага і без жонкі.

Акрамя таго, бачыць дзіця ён мог кожную сераду з 18.30 да 20.00 у прысутнасці былой жонкі падчас наведвання паркаў, дзіцячых кавярняў, крам і культурна-відовішчных мерапрыемстваў для дзяцей.

Такі парадак рэчаў мужчыну не задаволіў, і ён звярнуўся з нагляднай скаргай у Вярхоўны суд, які вызначыў, што спрэчка паміж бацькамі была развязаная правільна, бо спецыялісты выявілі ў дзіцяці высокі ўзровень прыхільнасці да маці.

Пры гэтым было ўстаноўлена, што ў сувязі з канфліктам паміж бацькамі дзіця знаходзіцца ў складаным псіхаэмацыйным стане, ягоны натуральны ўзрост значна абмяжоўвае магчымасць самастойна вызначыць сваё стаўленне да бацькі.

Нагадаем, што ўчора блізу 17.15 на Кастрычніцкай плошчы ў сталіцы невядомы мужчына падпаліў сябе. Побач падчас здарэння апынуліся двое супрацоўнікаў АМАП: яны хутка сарвалі падпаленую вопратку і патушылі. Усё прадаўжалася блізу паўтары хвіліны.