Шэсць краін ЕЗ выступілі за падаўжэнне памежнага кантролю

Нямеччына, Францыя, Аўстрыя, Бэльгія, Данія і Швэцыя просяць падоўжыць памежны кантроль яшчэ на паўгода.

Шэсць краін Еўразвязу просяць Брусэль аб магчымасці падаўжэння кантролю на ўнутраных межах ЕЗ, паведамляе ў суботу, 30 красавіка, Die Welt. Паводле інфармацыі выдання, з такім заклікам выступілі Нямеччына, Францыя, Аўстрыя, Бэльгія, Данія і Швэцыя, перадае Нямецкая хваля.

Яны накіравалі ліст першаму віцэ-прэзідэнту Еўракамісіі Францу Тымермансу і еўракамісару ўнутраных справаў і пытанняў міграцыі Дзімітрысу Аўрамапулосу з тым, каб кантроль з сярэдзіны траўня мог быць падоўжаны яшчэ як мінімум на паўгода. Краіны просяць запусціць патрэбны для гэтага механізм, прадугледжаны Шэнгенскім кодэксам аб межах.

"Мы заклікаем вас унесці прапанову ў Еўрапейскую раду з тым, каб ён дазволіў краінам-сябрам ЕЗ, якія прымуць гэта за патрэбнае, падоўжыць або ўвесці кантроль на ўнутраных межах Шэнгенскай зоны з 13 траўня", - гаворыцца ў лісце.

Крыніца: Брусэль дазволіць падоўжыць памежны кантроль

Брусэль у сярэдзіне наступнага тыдня дазволіць падаўжэнне кантролю на ўнутраных межах, бо вонкавыя межы ЕЗ па-ранейшаму недастаткова абаронены, паведамляе Die Welt са спасылкай на крыніцы ў Еўракамісіі.

Падаўжэнне гэтага захаду патрэбнае для таго, каб лепш кантраляваць плыні мігрантаў, сказала выданню крыніца ва ўрадавых колах Нямеччыны. "Калі колькасць прыбылых мігрантаў застанецца такой жа нізкай, мы не будзем прадаўжаць памежны кантроль пасля 12 траўня", - заяўляў раней міністр унутраных спраў краіны Томас дэ Мэзьер (Thomas de Maizière).

З-за вялікай колькасці прыбылых уцекачоў шэраг краін Шэнгенскай зоны, у тым ліку Нямеччына, увялі часовы памежны кантроль, тэрмін якога скончыцца ў сярэдзіне траўня 2016 года.

У канцы студзеня 2016 года стала вядома, што краіны Еўразвязу папрасілі Еўракамісію падрыхтаваць прававую аснову для падаўжэння памежнага кантролю ўнутры Шэнгенскай зоны. Згодна з дзейнымі нормам, краіны Шэнгенскай зоны могуць увесці кантроль на сваіх межах максімум на шэсць месяцаў. Але Шэнгенскі кодэкс аб межах прадугледжвае ў надзвычайных выпадках падаўжэнне праверак на такі тэрмін, пры якім іх агульная працягласць будзе дасягаць найболей два гады.