Амбасадар Літвы адмовіўся наведаць будаўніцтва БелАЭС

Эвалдас Ігнатавічус падкрэсліў, што праверку патрабаванняў ядзернай бяспекі павінны праводзіць экспэрты, а не дыпламаты.

Пасол Літвы ў Беларусі Эвалдас Ігнатавічус адмовіўся ад запрашэння Менска наведаць будаўніцтва Беларускай АЭС і асабіста пераканацца ў бяспечным правядзенні работ; дыпламат заявіў, што бяспеку павінны ацэньваць экспэрты, паведаміла ў аўторак агенцтва BNS.

На мінулым тыдні беларускаму амбасадару ў Літве Аляксандру Каралю МЗС Літвы ўручыла ноту ў сувязі з тым, што адбылося абрынанне будаўнічых канструкцый на БелАЭС, якая будуецца. Паводле звестак МЗС Літвы, ад беларускага дыпламата запатрабавалі даць падрабязную інфармацыю пра інцыдэнт на будаўніцтве АЭС у Астраўцы. Менск афіцыйна заявіў, што ніякіх інцыдэнтаў падчас будаўніцтва БелАЭС не было. Таксама ўлады Беларусі запрасілі амбасадара Літвы асабіста пераканацца ў бяспечным узвядзенні БелАЭС.

"Я адмовіўся аб прапановы, бо, па-мойму, гэтым павінны займацца экспэрты", - сказаў Ігнатавічус агенцтву.

Ён падкрэсліў, што праверку патрабаванняў ядзернай бяспекі павінна праводзіць міжнароднае агенцтва атамнай энэргіі МАГАТЭ.

Раней, у чэрвені 2011 года, Літва звярнулася са скаргай у камітэт аб парушэнні Беларуссю канвенцыі Espoo (Канвенцыя аб ацэнцы ўздзеяння на навакольнае асяроддзе ў транспамежным кантэксце) пры планаванні будаўніцтва Беларускай АЭС.