На Нямізе праз ДТЗ утварыўся вялізны затор з тралейбусаў

У цэнтры Менска сутыкнуліся аўтамабіль Volkswagen і тралейбус.

Прычынай сур'ёзнага затору стала дробязнае ДТЗ з амаль незаўважнымі наступствамі, паведамляе onliner.by.

Сутыкнуліся аўтамабіль Volkswagen Polo і тралейбус, якія рухаліся ў спадарожным кірунку вуліцай Няміга з боку Раманаўскай Слабады да скрыжавання з вуліцай Караля.

- Кіроўца Volkswagen прытармазіў, і яго злёгку закрануў тралейбус, які манеўраваў паміж радамі, - паведаміла cтаршы інспектар ДАІ Маскоўскага раёна Любоў Трапашка. - Пашкоджанні транспартных сродкаў мінімальныя. Аднак згодна з умовамі страхоўкі аўтамабіля ДТЗ абавязкова патрабавала афармлення, самастойна развязаць пытанне кіроўцы не маглі.

Такім чынам, давялося выклікаць ДАІ, рабіць адпаведныя замеры, афармляць дакументы. На гэта спатрэбіўся некаторы час, утварыўся затор.