Лукашэнка заклікаў італьянцаў рызыкнуць бізнэсам у Беларусі
65- 21.05.2016, 10:50
- 11,428
Беларусь і Італія абмяркоўваюць магчымасць стварэння бізнэс-рады.
Прапанову наконт фармавання падобнай структуры агучыў Аляксандр Лукашэнка падчас перамоваў у Рыме з прэзідэнтам Італіі Серджам Матарэлам, паведаміла паводле вынікаў сустрэчы прэс-служба беларускага дыктатара.
На думку Лукашэнкі, такая рада дапамагла б зняць многія пытанні ва ўзаемадзеянні бізнэс-структур. Прэзідэнт Італіі ў сваю чаргу падтрымаў такую ідэю, адзначыўшы, што гэта быў бы выдатны інструмент для садзейнічання супрацоўніцтву ў сферы бізнэсу і развязання розных узніклых пытанняў.
Як было адзначана ў час сустрэчы, у развіцці шматбаковага ўзаемавыгаднага супрацоўніцтва зацікаўлены як Беларусь, так і Італія. «Беларусь заўсёды будзе донарам стабільнасці і прыстойнасці ў адносінах як да Італіі, так і да Еўразвязу ў цэлым», – падкрэсліў беларускі дыктатар.
Улічваючы вялікую цікавасць італьянскага бізнэсу да Беларусі, Лукашэнка запэўніў у гатоўнасці дзейнічаць у гэтым кірунку. Асаблівую цікавасць для Беларусі ўяўляе досвед Італіі ў стварэнні малых і сярэдніх прадпрыемстваў у самых розных сферах, у тым ліку IT, АПК, вытворчасці і перапрацоўцы сельскагаспадарчай прадукцыі і іншых. Адзначана, што на аснове гэтых прадпрыемстваў у тым ліку неабходна ствараць трывалы падмурак для міждзяржаўнага ўзаемадзеяння.
Асобным пунктам у парадку дня абмяркоўваецца павелічэнне аб'ёмаў інвестыцыйнага супрацоўніцтва, стварэнне на тэрыторыі Беларусі не толькі сумесных, але і ўласных італьянскіх прадпрыемстваў. «Мы гатовы прапанаваць для гэтага ўсе неабходныя ўмовы», – сказаў дыктатар.
У свой час абмяркоўвалася магчымасць стварэння ў Брэсце італьянскага прамысловага парку.