Зміцер Вайцюшкевіч выступіў у Гародні

Хіты беларускага музыкі разам з ім выконвала ўся зала.

Выступ беларускага музыкі Змітра Вайцюшкевіча ў Гародні на курсах «Мова нанова Гародня» складаўся з тузіна разнастайных песень выканаўцы, паведамляе «Радыё Рацыя».

Новыя песні на словы паэта Уладзіміра Някляева перапляталіся з песнямі пра ваўка з альбома «Цацачная крама», а «Нёман» і «Бывайце здаровы» разам са спеваком спявала ўся зала:

«Традыцыйна ласкава сустракаюць воплескамі, песнямі і любоўю. Такая любоў у нас узаемная з Гародняй, мяне любяць, я люблю. Калі б не любілі, то я б можа і не паехаў так 130-140 кіламетраў туды, дзе не трэба гэтага рабіць. Дзякуй Богу паспеў, і я вельмі рады гэтаму», - распавёў Зміцер Вайцюшкевіч.

Зміцер трохі спазніўся на гарадзенскую сустрэчу, на якую адмыслова ехаў з Польшчы. Наступнае выступленне музыкі можна будзе пачуць у Вайцюшках, дзе 28 траўня адбудзецца невялікі фестываль, прысвечаны 80-годдзю з дня нараджэння паэта Генадзя Бураўкіна.