Сталі вядомыя падрабязнасці нападу на настаўніцу ў менскай гімназіі

Увечары 24 траўня следчыя змаглі дапытаць настаўніцу 74-й сталічнай гімназіі, на якую напаў яе вучань.

Як паведаміў БелаПАН начальнік аддзела інфармацыі і сувязі з грамадскасцю Следчага камітэта Беларусі Сяргей Кабаковіч, стан жанчыны ацэньваецца як стабільна цяжкі.

Яна распавяла, што 23 траўня блізу 8.30 у навучальны клас, папярэдне зачыніўшы за сабой дзверы, зайшоў навучэнец 9-га класа гімназіі. Падлетак падышоў да яе, нанёс некалькі удараў нажом у вобласць шыі, пасля чаго выйшаў з аўдыторыі.

У дачыненні да падлетка прызначаная комплексная псіхолага-псіхіятрычная экспэртыза.

Як паведамлялася раней падлетак, які падазраецца ў замаху на забойства, не лічыўся на ўліку ў інспекцыі ў справах непаўналетніх. Ён са шчаснай сям'і, станоўча характарызуецца педагогамі, добра вучыўся.

Сёння міністр унутраных спраў Беларусі Ігар Шуневіч паведаміў журналістам, што знойдзены нож, якім былі нанесеныя траўмы настаўніцы.