Менгарвыканкам забараніў лімузіны і рэстарацыі на выпускных

Выпускныя вечары павінны сціпла праходзіць у сценах школ. Сустракаць світанак пакуль наважылі не забараняць.

Старшыня камітэта адукацыі Менгарвыканкама Міхаіл Мірончык распавёў выданню «Вячэрні Мінск», чаму не ўсе прапановы сталічных школ аб правядзенні выпускных вечароў атрымалі адабрэнне.

- Мы вітаем традыцыйны падыход да правядзення выпускных вечароў. Святочныя балі павінны праходзіць у роднай школе, па-хатняму. У некаторых выпадках ідзем насустрач: дазваляем правесці выпускны баль на базе аб'ектаў сацыякультурнага прызначэння. Але для гэтага павінны быць аб'ектыўныя прычыны: напрыклад, ва ўстанове адукацыі не хапае пасадачных месцаў або актавая зала сумешчаная са сталовай. Адназначна забараняем арандаваць рэстарацыі, - адзначыў прадстаўнік Менгарвыканкама.

На думку чыноўніка, няма неабходнасці выдаткоўваць грошы, калі ў роднай школе можна арганізаваць праграму бясплатна і раіць падключаць больш фантазіі.

- Калі ў школе сапраўды цесна і горача, ніхто не забараняе ладзіць летнія амфітэатры на вуліцы. Калі я працаваў дырэктарам школы, такая арганізацыя праходзіла вельмі цікава.

Ён яшчэ раз падкрэсліў, што выпускны - не тое мерапрыемства, дзе бацькі павінны спаборнічаць гаманцамі.

- Начному катанню ў горадзе на лімузінах, рэстаранным меню няма месца на школьных выпускных. Такія прапановы паступалі, але мы іх не падтрымалі. Акрамя таго, не прымаю ніякіх бацькоўскіх застолляў. Мамы і таты пішуць у камітэт лісты: загадчыцы дзіцячага сада забаранілі праводзіць выязны выпускны ранішнік! А што гэтым малым потым прапанаваць пасля 11-га класа? Да чаго мы прывучаем моладзь?

Што ж тычыцца існай у многіх школах традыцыі - сустракаць світанак, то яе абмяжоўваць не будуць, паведаміў Міхаіл Мірончык.

Выпускныя вечары пройдуць у школах Менска 10 чэрвеня. У гэты дзень, як і ў дзень апошніх званкоў 30 траўня, у сталіцы будзе абмежаваны продаж алкаголю.

Базавую школу ў гэтым годзе заканчваюць 15 814 вучняў (гэта на 1 тысячу чалавек больш у параўнанні з мінулым годам), колькасць выпускнікоў сярэдняй школы 8823 (узрасла прыкладна на 1 тысячу чалавек). Апошнія званкі ў сталічных школах празвіняць 30 траўня.