У Венесуэле апазіцыя сабрала амаль два мільёны подпісаў для адстаўкі прэзідэнта

Апазіцыя ў Венесуэле дамагаецца правядзення рэферэндуму аб адхіленні ад улады прэзідэнта Нікаласа Мадура.

Апазіцыя ў Венесуэле перадала мясцовай Цэнтральнай выбарчай камісіі (ЦВК) 1,85 мільёна подпісаў для правядзення рэферэндуму, у выніку якога можа быць прынятая пастанова аб імпічменце прэзідэнта краіны Нікаласа Мадура. Пра гэта паведаміла кааліцыя апазіцыйных партый Блок дэмакратычнага адзінства (БДА), піша «Нямецкая хваля».

Паводле падлікаў, гэта колькасць подпісаў больш чым у дзевяць разоў перавышае неабходную для таго, каб ініцыяваць працэс арганізацыі рэферэндуму. Выканаўчы сакратар БДА Хесус Тарэальба паведаміў у сетцы мікраблогаў Twitter, што 80 скрыняў з падпісанымі зваротамі дастаўленыя ў ЦВК.

Каб пазбегнуць сутыкненняў з прыхільнікамі ўрада, дакументы былі перададзеныя супрацоўнікам камісіі ў начны час.

«Першы крок на шляху да адстаўкі прэзідэнта»

«Мы знаходзімся толькі ў пачатку шляху, які скончыцца рэферэндумам аб адстаўцы і абраннем урада нацыянальнага адзінства», - заявіў сакратар кааліцыі.

Адзін з галоўных паплечнікаў Мадура - дэпутат Нацыянальнай асамблеі Дзіасдада Кабеё заявіў у адказ на дзеянні апазіцыі: «Мы іх не баімся. Праверым усе подпісы, адзін за другім».

На першым этапе для склікання рэферэндуму неабходныя блізу 195 тысяч подпісаў грамадзян, а на другім - блізу 4 мільёнаў.

У студзені ўрад Венесуэлы ў сувязі з падзеннем коштаў нафты і імклівай інфляцыяй увёў у краіне надзвычайнае эканамічнае становішча. Таксама дзейнічае сістэма рацыянавання прадуктаў: на падставе апошніх лічбаў у нумары пасведчання асобы вызначаецца пытанне аб тым, у якой менавіта краме і ў які дзень тыдня грамадзяне маюць права набыць асноўныя прадукты харчавання.