Камунальнікі на грузавіку разбурылі лесвіцу ў Лошыцкім парку

Сведкамі па-сапраўднаму дзіўных паводзін работнікаў адной з камунальных службаў сталі адпачывальнікі Лошыцкага парку.

Разбуральную кемлівасць праяўляюць часам нашы грамадзяне: нашчадкі партызан ведаюць, што на шляху да мэты можна змятаць усякія перашкоды і скарачаць адлегласць. Сведкамі па-сапраўднаму дзіўных паводзін работнікаў адной з камунальных службаў сталі мянчук Дзмітрый з жонкай, піша onliner.by. Увечары ў пятніцу муж і жонка каталіся на роварах у Лошыцкім парку і знялі вельмі займальнае відэа.

- Усё адбылося ў мінулую пятніцу а 20:25, - памятае канкрэтную дату і час маладзён. - Карыстаючыся добрым надвор'ем, мы з жонкай каталіся на роварах. І раптам убачылі такі цуд - балазе што зафатаграфаваць усё на тэлефон здолелі, а то б ніхто і не паверыў. Адкуль аўтамабіль заехаў і які быў яго папярэдні шлях, не ведаем - «злавілі», калі ён ужо «скакаў» па прыступках.

- Грузавік быў адзін, але ў кабіне сядзелі два чалавекі, якія так падскаквалі ад гэтай трасяніны, што ледзь галавой кабіну не папрабівалі. А потым мы падышлі і паглядзелі на прыступкі - яны праз адну разбураныя. Незразумела, чым людзі думаюць. Гэта машына «палівальшчыкаў» - шланг і бочка вады, нумар, наколькі я памятаю, 8375-7. Гэта значыць, дрэвы паліваюць, а дарожкі знішчаюць. Вось такое стаўленне да грошай падаткаплацельшчыкаў, - дзівіцца антаганістычнасці быцця камунальнікаў хлопец.

Убачаным кіраўніцтва Лошыцкага парку было шакаванае:

- Машына не наша, магчыма, раённага Рамаўтадара. Будзем высвятляць. Такая язда зусім недапушчальная. Для нас загадка, што «бочка» наогул рабіла ў парку. У нас такіх машын няма, усе нашы «бочкі» на базе ЗІЛ. Чужая машына заехала ў парк і столькі разбурыла. А мы ходзім, рамантуем лесвіцу і галаву ламаем, як можна было нагамі або камянямі зламаць прыступкі...