Сіноптык: Сайты надвор’я падманваюць людзей
13- 31.05.2016, 9:26
- 10,672
Людзі, плануючы свае выходныя ці нават адпачынак, арыентуюцца на прагнозы надвор'я ў Інтэрнэце.
Некаторыя сайты даюць прагноз надвор'я на месяц ці нават квартал, але з навуковымі даследаваннямі надвор'я гэтыя звесткі маюць вельмі мала агульнага.
Пра гэта ў жывым эфіры «Обозревателя» заявіла метэаролаг Алена Грыгарава.
«Пяць дзён - на такі крайні тэрмін можна рабіць навукова абгрунтаваны прагноз надвор'я. Чым далей ад гэтага тэрміну, тым больш недакладныя звесткі. І наогул, 100% прагноз магчымы толькі на тры дні наперад. Чацвёрты-пяты дзень - гэта 90% супадзенняў. А далей, гэта ўжо, хутчэй, тэндэнцыі надвор’я, чым прагноз», - сказала Грыгарова.
Экспэртка ўдакладніла, што працяглыя прагнозы - справа рук не сіноптыкаў, а людзей іншых прафесій, якія спрабуюць працаваць на гэтай ніве. Іх метады вельмі адрозніваюцца ад тых, што выкарыстоўваюць сіноптыкі для пабудовы кароткатэрміновых прагнозаў.
«Метэаролагі, кліматолагі з усяго свету, усе, каму гэта цікава, абменьваюцца сваімі тэорыямі, вымярэннямі, складаюць лічбавыя мадэлі, на падставе якіх спрабуюць разлічыць змены ў надвор'і. Абапіраюцца на статыстыку, улічваючы глабальнае змяненне клімату і розныя фізічныя законы. Але, шчыра кажучы , гэтыя мадэлі не апраўдваюць сябе. Далёкія прагнозы - гэта нерэальна. У працэсе сваёй працы я бачу, наколькі нерэальна стварыць прагноз нават на два тыдні. У атмасферы ўсё мяняецца даслоўна за гадзіны - мы кожны дзень удакладняем свае прагнозы», - падагульніла экспэрт.