У Менску з'явілася паслуга «Хаскі на гадзіну»
4- 31.05.2016, 15:23
- 22,663
У сетцы з'явілася група, які прапануе пракат жывёлін для фотасесій.
Гаворка ідзе пра сабак пароды хаскі і чаў-чаў, а таксама коцікаў і трусоў. «Вось такі мілы звярок парадуе вас сваёй прысутнасцю. Дэкаратыўны трусік Кроша. Спакойна сядзіць на руках. Любіць фатаграфавацца», - апісваецца адна з мадэляў. Журналісты onliner.by патэлефанавалі стваральніцы каталога, каб задаць пытанні пра спакой сабак і магчымую незадаволенасць абаронцаў жывёлін.
- Плануецца, што жывёліны будуць выкарыстоўвацца для фотасесій, - кажа Надзея. - Я фатограф і заводчык. Многія знаёмыя часта пыталіся ў мяне, наколькі магчыма сфатаграфавацца з маімі сабакамі. У выніку я наважылася стварыць каталог.
Механізм працы вельмі просты. Кліент выбірае ўпадабаную жывёліну. Да яго прыязджае ўладальнік, прывозіць гадаванца для фотасесій і пасля з'язджае. Праўда, не ўсе каты і сабакі жывуць у Менску. За іншагародніх мадэляў давядзецца даплаціць, каб кампенсаваць выдаткі на падарожжа.
- У нас у каталогу прадэманстраваны трусік. Наконт яго кошт па дамове. Уладальніца хацела 100-150 тысяч за гадзіну. Чаў-чаў будуць самымі дарагімі. Іх дорага абучаць. Трэба купаць, чухаць і ўсяляк падрыхтоўваць да фотасесіі. Проста так узяць і прывезці яго на здымку не атрымаецца. Хаскі каштуе 200 тысяч на гадзіну. Цяпер гэта самая папулярная парода.
Надзея плануе пашырыць каталог коньмі і іншымі хатнімі жывёлінамі, каб выбар не абмяжоўваўся катамі, сабакамі і трусамі.
- Абаронцам жывёл напэўна не спадабаецца ваш бізнэс.
- Я не ўважаю яго за цынічны або жорсткi. Мае сабакі ўдзельнічаюць у чэмпіянатах свету і іншых выставах. Яны прывучаныя да людзей. Калі прапануецца студыйная фотаздымка, я не дазваляю, каб іх фатаграфавалі з выбліскам. А на вуліцы ён не патрэбны. Таму мае сабакі спакойна фатаграфуюцца. Ніякага стрэсу ў іх няма. Якіх-небудзь пазаштатных сітуацый, калі спалоханы сабака ўкусіў б кагосьці, у мяне не адбывалася. Тым больш, ведаючы сваіх сабак, я стараюся выбіраць самых спакойных.