Беларус увайшоў у шорт-ліст расейскай літаратурнай прэміі «Вялікая кніга»

Усяго за перамогу пазмагаюцца 11 пісьменнікаў, сярод якіх таксама Людміла Уліцкая, Сяргей Салавух, Аляксей Іваноў ды іншыя.

Імёны трох фіналістаў прэміі абвесцяць на ўрачыстай цырымоніі ў снежні гэтага года, перадае «Белсат».

Саша Філіпенка ўдзельнічае ў конкурсе са сваім трэцім раманам «Цкаванне». У новай кнізе аўтар апісвае пераслед рэдактара незалежнага журналіста ў сучаснай Расеі. Прэзентацыя «Цкавання» ўжо адбылася ў Беларусі ды Расеі.

Пісьменнік і журналіст, лаўрэат «Рускай прэміі» 2014 года Саша Філіпенка працаваў на «Першым канале», у тым ліку пісаў сцэнары да праграм «Прожекторпэрисхилтон», «Мультличности», «YestardayLive». Цяпер з'яўляецца вядучым тэлеканала «Дождж», піша для часопісаў «Сноб» і «GQ». Адзін з маштабных праектаў журналіста - тэлешоў «Вячэрні Герасімец».

Нацыянальную прэмію «Вялікая кніга» заснавалі ў 2005 годзе Цэнтр падтрымкі айчыннай славеснасці. Яе прызавы фонд з'яўляецца найбуйнейшым сярод літаратурных узнагарод Расеі і краін СНД. Грашовы эквівалент першай прэміі складае 3 млн рублёў (45 тысяч даляраў), другі - 1,5 млн рублёў, трэцяй - за 1 млн рублёў.