У працы App Store адбыўся глабальны збой
- 5.05.2016, 14:07
- 5,876
З пошуку ва ўсім свеце зніклі некаторыя папулярныя дадаткі, напрыклад, Instagram, «Вконтакте», YouTube.
Карыстальнікі сацыяльных сетак у чацвер, 5 траўня, паведамілі аб збоі ў пошуку ў App Store. Сярод дадаткаў, якія перасталі адлюстроўвацца ў пошуку ў анлайн-краме, - YouTube, Instagram, мэсэнджары Telegram, Skype і Facebook Messenger.
Таксама не знаходзяцца многія дадаткі расейскіх кампаній - напрыклад, сэрвісаў для бранявання авіяквіткоў Aviasales і OneTwoTrip, сацыяльных сетак «Вконтакте» і «Аднакласнікі». Самі дадаткі не зніклі з App Store: яны даступныя для запампоўвання праз старонку з рэйтынгамі самых папулярных дадаткаў, абнаўленні ўжо ўсталяваных у карыстальніка сэрвісаў таксама працуюць.
Паведамленні аб праблеме з'яўляюцца ў Twitter з усяго свету. «Нешта дзіўнае адбываецца з пошукам у App Store», - піша карыстальнік @_kyleyamamoto з ЗША. Аб той жа памылцы паведамілі карыстальнікі з Вялікай Брытаніі, Аўстраліі, Гішпаніі. Жыхар Нямеччыны піша, што пошук не працуе з учорашняга дня.
Збой сапраўды глабальны. У ЗША праз пошук App Store таксама нельга знайсці дадаткі Instagram і многія іншыя, распавёў РБК тэхнічны дырэктар сэрвісу Bookmate Ілля Міхееў, дадаўшы, што прыкладанне ягонай кампаніі таксама прапала з пошукавай выдачы.
Праблема сапраўды ёсць, заявіла прадстаўніца «Аднакласнікаў» Наста Жбанава. Паводле яе слоў збой заўважылі сёння і гаворка ідзе не толькі аб Расеі, але і іншых краінах. «Праблема на баку Apple, мы адправілі запыт, адказ пакуль не атрымлівалі», - адзначыла Жбанава. Прадстаўніку Aviasales таксама вядома аб збоі - ён спадзяецца, што пытанне развяжацца, калі ў Каліфорніі пачнецца працоўны дзень, бо «цяпер там тры гадзіны раніцы».
У Расеі недаступнымі для пошуку выявіліся і дадаткі мабільных аператараў - для доступу да асабістых кабінетах абанентаў або, напрыклад, дадаткі для прагляду тэлеканалаў і фільмаў. «Цяпер мы рыхтуем у зварот у Apple з гэтай нагоды», - паведаміў прадстаўнік МТС Дзмітрый Саладоўнікаў. У «МегаФоне» таксама ведаюць пра праблему, паведаміла прадстаўніца кампаніі Юлія Дарохіна.
Прадстаўнікі Apple, «Вконтакте» і OneTwoTrip пакуль не адказалі на запыт РБК.