На выбарах у Шатландыі ўпэўнена перамагаюць нацыяналісты

Шатландская нацыянальная партыя лідаруе на выбарах у шатландскі парламент.

Паводле папярэдніх вынікаў галасавання, якое адбылося ў «суперчацвер», за яе аддалі галасы 46,5% выбарцаў.

Ужо вядомыя ўладальнікі 93 з 129 дэпутацкіх мандатаў. 58 з іх дастаюцца шатландскім нацыяналістам. Прыход на выбарах склаў 55,5% выбаршчыкаў, паведамляе BBC.

Прыкметнага поспеху ў Шатландыі дамаглася і Кансерватыўная партыя - яна агулам набірае 21,9% галасоў. Гэта не нашмат менш, чым у Лейбарысцкай партыі (22,7%), чые пазіцыі ў Шатландыі традыцыйна былі больш моцнымі.

Пры гэтым кансерватарам дастаецца больш дэпутацкіх мандатаў, чым лейбарыстам - на гэты момант 16 супраць 11. Гэта значны поспех шатландскіх кансерватараў: яны атрымліваюць у новым парламенце на восем месцаў больш, чым паводле вынікаў папярэдніх выбараў, у той час як лейбарысты - на 13 менш.

Па чатыры месцы ў парламенце Шатландыі атрымліваюць Ліберальна-дэмакратычная партыя і Партыя зялёных. Прадстаўнікі Незалежнай партыі пакуль што ў парламент не праходзяць.

Лідар Шатландскай нацыянальнай партыі, якая перамагае на выбарах, Нікола Стэрджэн з'яўляецца паслядоўнай прыхільніцай аддзялення Шатландыі ад Злучанага Каралеўства. Яна неаднаразова намагала на паўторным правядзенні рэферэндуму з гэтай нагоды ў найбліжэйшыя гады, нягледзячы на пярэчанні Лондана.

Са словаў Стэрджэн, такі рэферэндум будзе непазбежны ў выпадку выхаду Вялікай Брытаніі з Еўрапейскага Звязу. Шатландская нацыянальная партыя выступае за тое, каб Шатландыя заставалася ў складзе ЕЗ.

Лейбарысты губляюць галасы

Лейбарысцкая партыя на мясцовых і рэгіянальных выбарах у Вялікай Брытаніі дэманструе слабыя вынікі. На гэта паказваюць прамежкавыя вынікі галасавання.

Гэтыя выбары павінны стаць свайго кшталту праверкай для Лейбарысцкай партыі, якую ў верасні мінулага года ўзначаліў Джэрэмі Корбін. Палітык вядомы сваімі даволі радыкальнымі левымі поглядамі, якія не падабаюцца частцы выбаршчыкаў.

Кансерватыўная партыя, якая перамагла на леташніх парламенцкіх выбарах, паказвае поспехі ў Шатландыі, але прыкметна здае ў Англіі, асабліва на поўдні, дзе яе падтрымка традыцыйна была максімальнай. Кансерватары пазбавіліся кантролю над муніцыпалітэтам Вустэра.

Ліберальныя дэмакраты спрабуюць аднавіць свае пазіцыі, якія апошнім часам сур'ёзна саслаблі. Пры гэтым на выбарах сур'ёзна вырасла падтрымка Партыі незалежнасці Злучанага Каралеўства, якая намагае на выхадзе краіны з ЕЗ.

У «суперчацвер» брытанцы выбіралі чальцоў Шатландскага парламента, Асамблеі Уэльса, Асамблеі Паўночнай Ірландыі, а таксама 124 муніцыпальных радаў у Англіі. Таксама ў гэты дзень прайшлі выбары мэраў вялікіх гарадоў, уключаючы Лондан, Брысталь і Ліверпуль. Вынікі гэтых выбараў павінны быць падведзеныя ў пятніцу.