Лідар «Маладых дэмакратаў» звярнулася ў ААН са скаргай на беларускія ўлады

Актывістка бароніць сваё права на правядзенне пікету супраць фальсіфікацый на «выбарах».

1 чэрвеня лідар «Маладых дэмакратаў» Аб'яднанай грамадзянскай партыі Алена Луцковіч накіравала індывідуальны зварот у Камітэт ААН правоў чалавека, піша gomelspring.org.

Гаворка ідзе пра дзёрзкі пікет, які яна правяла адразу пасля леташніх прэзідэнцкіх «выбараў» у райцэнтры Акцябрскі Гомельскага рэгіёну, выйшаўшы да рынку з плакатам: «У мяне ёсць довады, што выбары сфальсіфікаваныя!»

Дзеянні Алены былі расцэненыя як несанкцыянаванае масавае мерапрыемства ў форме пікета, супраць яе склалі пратакол і перадалі адміністрацыйную справу ў суд. Суддзя Кастрычніцкага раёна Уладзімір Васілеўскі прызнаў лідара МД АГП вінаватай у парушэнні парадку арганізацыі і правядзення масавага мерапрыемства і налажыў вялікі адміністрацыйны штраф.

На думку Луцковіч, падчас разгляду яе справы ў судах былі парушаныя правы, замацаваныя і гарантаваныя Рэспублікай Беларусь у Міжнародным пакце аб грамадзянскіх і палітычных правах.

Аднак Кастрычніцкі раённы суд, а следам за ім, і старшыні больш высокіх судоў пры разглядзе скаргаў адмовіліся кваліфікаваць яе дзеяння зыходзячы з нормаў Міжнароднага пакта, хоць аргументы, выкладзеныя ў скаргах, былі дарэчнымі і важнымі.

Алена Луцковіч просіць Камітэт ААН разгледзець яе зварот і, устанавіўшы факт парушэння права на выказванне меркавання, рэкамендаваць ураду Беларусі прывесці нормы нацыянальнага закона «Аб масавых мерапрыемствах» у адпаведнасць з міжнароднымі абавязаннямі, а менавіта ў адпаведнасць з артыкулам 19 Міжнароднага пакта аб грамадзянскіх і палітычных правах.