У Гомелі па ручаіне цякло малако
6- 1.06.2016, 16:11
- 10,124
Белая вадкасць напоўніла ручай на тэрыторыі аднаго з гаражных кааператываў.
Незвычайную з'яву сфатаграфаваў учора ўвечары гамяльчук Алег Місочанка, здымкі з'явіліся ў супольнасці «Гэта Гомель, дзетка!».
Выпрастаная ручаіна працякае сярод гаражоў і праз паўкіламетра ўпадае ў возера, якое злучаецца з ракой, піша onliner.by.
- Такое пачуццё, што проста злілі малако, колер шчыльны, паху кіслага малака няма, але, думаю, будзе. Сёння уранку вада была ўжо колеру кавы з малаком, - распавёў аўтар здымкаў. - Раней нешта такое таксама здаралася, але не ў такіх маштабах.
Паміж ААТ «Мілкавіта» і гаражамі каля сотні метраў. Якім чынам малочныя прадукты (калі гэта яны) трапілі ў ручаіну - загадка. Тым больш што, як кажуць на прадпрыемстве, у іх не выкарыстоўваецца такая сістэма водаадвядзення, сцёкі, пасля папярэдняй ачысткі, павінны трапляць у агульную каналізацыю і накіроўвацца на гарадскія ачышчальныя збудаванні.
Са словаў Алега, у гэты несамавіты безназоўны ручай заходзіць рыба, у ім зімавалі качкі. Як бы там ні было, відавочна, рыбы тут больш няма - малочная сыроватка з'яўляецца адным з найбольш небяспечных прадуктаў для воднай флоры і фауны.
На прадпрыемстве паведамілі, што высвятляюць, якая прырода белай вадкасці і як яна трапіла ў ваду. Аб выніках паведамяць дадаткова.