Улады не ведаюць, каму прадаць «Брэсцкае піва»
6- 1.06.2016, 17:24
- 34,417
Эканамічны суд Берасцейскай вобласці прыняў пастанову падоўжыць тэрмін санацыі ААТ «Брэсцкае піва» на адзін год.
Пра гэта гаворыцца ў паведамленні суда.
Нагадаем, летась тройчы абвяшчаўся конкурс на продаж прыналежных вобласці акцый ААТ «Брэсцкае піва» (блізу 90%), аднак ніводнай заяўкі ад патэнцыйных пакупнікоў не паступіла.
Сёлета прынятая пастанова прыцягваць стратэгічнага інвестара з дапамогай продажу прадпрыемства як маёмаснага комплексу. Гэта адна з прычын, чаму яшчэ на год прадоўжаны перыяд санацыі, а не адкрытая ліквідацыйная вытворчасць, сказаў tut.by антыкрызісны кіраўнік «Брэсцкага піва» Сяргей Цяльпук.
Цяпер на прадпрыемстве праходзіць «тэхнічная інвентарызацыя» будынкаў, збудаванняў і інжынерных сетак. Пасля чаго трэба будзе зарэгістраваць маёмасны комплекс і абвясціць аўкцыён аб яго продажы.
За чатыры месяцы загрузка вытворчых магутнасцяў «Брэсцкага піва» склала 64,3%. Ільвіную долю складае разліў уласных гатункаў піва, нядаўна былі запушчаныя тры новыя маркі. Акрамя таго, кампанія на давальніцкіх умовах разлівае напой для «Аазіс Груп» і ўласную гандлёвую марку для рытэйлера «Еўраопт». Раней «Аазіс» называўся ў якасці патэнцыйнага пакупніка «Брэсцкага піва». Сяргей Цяльпук сказаў, што некалькі кампаній праяўляюць цікавасць да прадпрыемства.
Паводле звестак Мінфіна, за 2015 год прыбытак «Брэсцкага піва» склаў 119,5 мільярда рублёў, чыстая страта - 22,7 млрд. «У дынаміцы фінансавая сітуацыя на прадпрыемстве паляпшаецца. За 4 месяцы гэтага года страта склала 2,2 мільярда рублёў, а за аналагічны перыяд мінулага года - 11,5 млрд. Мы спадзяемся выйсці паводле вынікаў 2016 года на бясстратную працу. А разлічыцца з крэдыторамі ў перыяд санацыі зможа пасля продажу прадпрыемства як маёмаснага комплексу», - сказаў антыкрызісны кіраўнік.