CNN: Клінтан апярэджвае Трампа на 2%
11- 1.06.2016, 19:03
- 20,036
Кандыдат у прэзідэнты ЗША ад Рэспубліканскай партыі Дональд Трамп скарачае адставанне ад кандыдата Дэмакратычнай партыі Хілары Клінтан.
Кандыдатка ў прэзідэнты ЗША ад Дэмакратычнай партыі Хілары Клінтан, паводле апытанняў, апярэджвае свайго канкурэнта - кандыдата ад Рэспубліканскай партыі Дональда Трампа - на 2%. Пра гэта паведамляе gordonua.com са спасылкай на амерыканскі тэлеканал CNN.
Згодна з пяццю апошнімі агульнанацыянальнымі апытаннямі, Клінтан падтрымліваюць 45% рэспандэнтаў, кандыдата ад рэспубліканцаў - 43%.
За апошнія месяцы Трамп істотна скараціў адставанне ад прадстаўніцы дэмакратаў. Апытанні ў сакавіку-красавіку паказвалі разрыў паміж кандыдатамі на 10-14%.
Клінтан дагэтуль не набрала 2383 галасы дэлегатаў нацыянальнага з'езду Дэмакратычнай партыі, неабходных для афіцыйнага вылучэння кандыдаткай ад сваёй палітычнай сілы. У сваю чаргу Трамп застаўся адзіным кандыдатам ад рэспубліканцаў.
Першым афіцыйным кандыдатам у прэзідэнты ЗША стаў лібертарыянец Гэры Джонсан.
Прэзідэнцкія выбары ў ЗША адбудуцца сёлета 8 лістапада.