Расейскіх лёгкаатлетаў не дапусцілі да Алімпіяды-2016
63- 17.06.2016, 16:59
- 22,702
Такую пастанову прыняла Рада Міжнароднай асацыяцыі лёгкаатлетычных федэрацый (IAAF).
Рада Міжнароднай асацыяцыі лёгкаатлетычных федэрацый (IAAF) пасля пасяджэння ў Вене прыняла пастанову не аднаўляць сяброўства Усерасейскай федэрацыі лёгкай атлетыкі (ВФЛА), паведамляе «Р-спорт».
Гэта азначае, што расейскія лёгкаатлеты не змогуць узяць удзел у Алімпіядзе ў Рыа-дэ-Жанэйра.
У галасаванні ўзялі ўдзел 26 з 27 чальцоў рады IAAF, бо генеральны сакратар Усерасейскай федэрацыі лёгкай атлетыкі Міхаіл Бутаў раней адмовіўся ў ёй удзельнічаць.
Пастанова аб удзеле астатняй нацыянальнай каманды Расеі на Алімпіядзе будзе прынятая на пасяджэнні Міжнароднага алімпійскага камітэта ў Лазане 21 чэрвеня.
За некалькі дзён да галасавання Сусветнае антыдопінгавае агенцтва (ВАДА) апублікавала справаздачу, у якім расказала аб махінацыях з допінг-пробамі і зрыве 736 допінг-праверак у расейскіх спартоўцаў у 2016 годзе.
Расейскую нацыянальную каманду папярэдне адхілілі ад удзелу ў Алімпіядзе ў траўні, пасля таго як экс-кіраўнік маскоўскай антыдопінгавай лабараторыі Рыгор Родчанкаў у інтэрв'ю The New York Times распавёў пра тое, што асабіста рыхтаваў «допінгавы кактэйль» для траіх расейцаў-алімпійцаў.
У пачатку чэрвеня ён з'явіўся ў фільме нямецкага тэлеканала ARD, у якім паведаміў, што ў допінгу расейскіх лёгкаатлетаў удзельнічалі кіраўнік Мінспорту РФ Віталь Мутко, ягоная дарадца Наталля Жаланава і іншыя спартовыя функцыянеры.
Раней прэзідэнт Міжнароднага алімпійскага камітэта Томас Бах заявіў, што расейскай нацыянальнай камандзе пагражае адхіленне ад Алімпіяды ў Рыа-дэ-Жанэйра, калі інфармацыя аб тым, што ў краіне існуе «арганізаваная і ўсёабдымная сістэма допінгу», пацвердзіцца. Тады Мутко дапусціў «найгоршы сцэнар», пры якім нацыянальная каманда прапусціць спаборніцтвы, аднак адхіліў абвінавачванні ў сістэматычным ужыванні допінгу ў Расеі.