Банк пазбавіў беларускіх планерыстаў адзінага месца для трэніровак

«Белаграпрамбанк» узяў у арэнду ўзбярэжжы вадасховішча і забараніў спартоўцам там трэніравацца.

На раўнінных прасторах беларускай зямлі аматарам неба жывецца цяжка, а знатакам пераборлівых палётаў на планёрах яшчэ больш складана. Са слоў планерыста са стажам Валерыя, у Беларусі быў усяго адзін пагорак, які дазваляў злавіць плыні ветру і паляцець без спецыяльных прыстасаванняў. Ён і сёння стаіць на месцы, а вось прыхільнікаў планёрнага спорту туды больш не пускаюць: банк арандаваў зямлю на ўзбярэжжы Дуброўскага вадасховішча разам з узвышшам і адгарадзіў яе парканам, піша onliner.by.

Планерызм не вельмі папулярны ў Беларусі: гор тут менш, чым лядовых палацаў. Са слоў Валерыя, прыхільнікаў гэтага тыпу спорту ў краіне ўсяго некалькі соцень. Пасля страты месца для трэніровак распаўся іх спартовы клуб - спартоўцаў стала яшчэ менш.

- Мы доўга не маглі знайсці годную мясцовасць, дзе можна лётаць, - настальгуе Валерый. - Яшчэ з савецкіх часоў планерысты ездзілі па Беларусі і спрабавалі розныя варыянты горак.

Горка ў Прылепах на беразе Дуброўскага вадасховішча заўсёды ўважалася за найлепшую. Там можна было ўзлятаць без лябёдак, матораў і дадатковых прыстасаванняў. Горка невысокая - перапад усяго метраў 20, але яна ўнікальная для Беларусі. Там побач возера, потым горачка пачынаецца, а на ёй невялічкі лес...Калі дзьмуў паўднёвы вецер, можна было лётаць хоць увесь дзень. Там навучалася большасць пачаткоўцаў: больш жа няма дзе.

Некалькі гадоў таму ўзбярэжжа Дуброўскага вадасховішча, якое знаходзіцца недалёка ад спартовага комплексу «Раўбічы», узяло ў арэнду адно з даччыных прадпрыемстваў «Белаграпрамбанка» - ПУП «Азярыцкі-Агра». На арандаванай тэрыторыі арганізацыя ўсталявала альтанкі, мангалы, лавачкі, шапікі з ежай. Уезд на пляж зрабілі платным, а доступ да гары і зусім забаранілі. Само ўзвышша пакуль не асвоенае і зарастае бур'яном.

Планерысты спрабавалі дамовіцца з банкам, але ўкладаць угоду ў іх так і не атрымалася.

- Першапачаткова банк пускаў нас на пляцоўку. Праўда, толькі за грошы. Мы плацілі 500 даляраў арэнды на месяц, а адзін занятак каштаваў блізу 50 тысяч, на той час гэта прыраўноўвалася прыкладна да 7 даляраў. Плаціць за горку, якую праз спецыфіку беларускага надвор'я мы наведвалі максімум некалькі раз на месяц, нам было не з рукі. Калі мы завялі гутарку пра тое, што гэта занадта высокі кошт за горку, якую мы ўсё жыццё наведвалі бясплатна, банк сказаў, што нам наогул лепш больш не прыязджаць, ім так будзе зручней. Маўляў, для іх гэта лішняя адказнасць.

Пасля гэтага некаторыя хлопцы, вядома, прабіраліся туды нелегальна, але, паводле расповедаў, часам справа нават даходзіла да выкліку міліцыі і складання пратаколаў. Складана ісці супраць сістэмы, але мы вельмі засмучаныя адсутнасцю такой магчымасці.

Яны на ўзвышшы нічога не робяць ужо гадоў пяць, яно зарастае бур'яном і стаіць без справы. Тым больш яно знаходзіцца ў баку ад берага, Гэта значыць, адпачывальнікам мы не перашкаджалі...Нам не кажуць, што плануюць рабіць з гэтай гарой. Будуць яны яе забудоўваць ці не? Ці яны яе наогул з зямлёй хочуць зруйнаваць? Можа, ім варта было б падумаць пра людзей, а не толькі пра грошы?

Большасці аматараў планернага спорту сёння даводзіцца выязджаць за мяжу для заняткаў.

Прадстаўніца даччынага прадпрыемства «Белаграпрамбанка» Анжаліка Гушчэня адмовілася адказваць, якія ў іх планы на гару і што з ёй будзе ў будучыні:

- У арэнду мы гэты пляц ніколі не здавалі. ААТ «Авія» звярталася ў Смалявіцкі райвыканкам, але сваё пытанне яны да канца не давялі. З боку «Белаграпрамбанка» не было складзена ніякіх угодаў. Гэта ж не проста так - узяў і падняўся! Павінны быць нормы выкананыя. А як наконт адпачывальнікаў? Не могуць яны прычыніць шкоду? А калі гэты планёр упадзе на пляж? Усякае ў жыцці бывае.

Яны могуць звярнуцца ў райвыканкам з просьбай выдзеліць ім зямлю для трэніровак. Мы ж іх проста так пусціць не можам, гэта вялікая адказнасць. Здаць ім у арэнду зямлю мы паводле закону таксама не маем права: здаваць у арэнду мы можам толькі аб'ект, а аб'ектаў там ніякіх няма.