Ярмошына пра выбары ў «палатку»: Улада пажадала, каб 30% «дэпутатаў» засталіся

Пра тое, што «дэпутаты» не абіраюцца, а прызначаюцца ўжо не саромеюцца казаць нават на самым высокім узроўні.

На пасяджэнні 28 чэрвеня ЦВК сфармаваў Назіральную раду для кантролю за СМІ, якая будзе сачыць у тым ліку за тым, каб будучыя кандыдаты ў «дэпутаты» не пачалі агітаваць за сябе раней належнага тэрміну. У Раду уваходзяць толькі прадстаўнікі дзяржаўных СМІ, кандыдатаў вылучыў Мінінфарм, піша kp.by.

Старшынём рады стаў першы намеснік міністра інфармацыі Ігар Луцкі. У складзе - прадстаўнікі агенцтва БелТА, «Мінск-навіны», газеты «СБ - Беларусь сегодня» і Нацыянальнай тэлерадыёкампаніі.

Згодна з традыцыяй апошніх кампаній блізу 30% старых «дэпутатаў», пераабіраліся ў новы «парламент».

- Як вы ведаеце, пажаданне афіцыйнай улады: каб 30% («дэпутатаў» папярэдняга склікання. - заўвага) увесь час захоўвалася, пераходзіла (з аднаго складу ў іншы. - заўвага). Гэта выяўляецца ў тым, што існаму «дэпутацкаму» корпусу кіраўніцтва «парламента» рэкамендуе пераабрацца. Гэта для тых, хто прапрацаваў адзін тэрмін і не больш за тое. Тыя, хто прапрацаваў два тэрміны, рэкамендуюць шукаць іншую дзейнасць, - растлумачыла старшыня ЦВК Лідзія Ярмошына. - ЦВК не мае інфармацыі, хто з іх збіраецца пайсці паўторна, хто збіраецца сысці адпачываць ці на іншую працу.

Апошні тэрмін падачы заявы на рэгістрацыю ініцыятыўнай групы будучых кандыдатаў у «дэпутаты» - 7 ліпеня.