Смерць дзіцяці ў Гародні: прычыну не назвалі, але вакцыну апраўдалі

У Беларусі аднавілі выкарыстанне вакцыны «Прыорыкс», пасля ўжывання якой у Гародні памерла шасцігадовая дзяўчынка.

Прычым зробленае гэта нягледзячы на тое, што прычына смерці дзіцяці дагэтуль не названая.

Намесніца начальніка аддзела гігіены, эпідэміялогіі і прафілактыкі Міністэрства аховы здароўя Іна Карабан паведаміла БелаПАН, што ўжыванне гэтай вакцыны аднавілі з 20 чэрвеня - у сувязі з тым, што «не было выяўлена адхіленняў якасці лекавага сродку як на момант пастаўкі на тэрыторыю Рэспублікі Беларусь, так і падчас яго выкарыстання».

«Усе серыі вакцыны «Прыорыкс» вытворчасці GlaxoSmithKline Biologicals s.a., Бельгія, якія выкарыстоўваюцца ў Рэспубліцы Беларусь, у чэрвені 2016 года прайшлі кантроль якасці і ў выніку выпрабаванняў адпавядаюць патрабаванням у правераных паказчыках і раздзелах», - сказала Карабан.

Якасць лекавага сродку «Прыорыкс» на момант пастаўкі ў Беларусь таксама пацвярджаецца наяўнасцю шэрагу сертыфікатаў адпаведнасці патрабаванням Належнай вытворчай практыкі лекавых сродкаў, падкрэсліла супрацоўніца Міністэрства аховы здароўя. Вакцына «Прыорыкс» рэкамендаваная Сусветнай арганізацыяй аховы здароўя для выкарыстання ў нацыянальных праграмах імунізацыі.

Выкарыстанне вакцыны «Прыорыкс» было прыпыненае ў пачатку чэрвеня гэтага года пасля таго, як 31 траўня ў Гародні памерла прышчэпленае ёю дзіця. З паведамленняў Следчага камітэта, блізу 16:00 31 траўня ў дзіцячай паліклініцы №1 Гародні пасля ўвядзення камбінаванай вакцыны супраць адзёру, паратыту і краснухі стан здароўя у шасцігадовай дзяўчынкі значна пагоршыўся. Нягледзячы на намаганні лекараў, яна памерла на вачах у маці. Пра тое, як менавіта пагаршаўся стан дзіцяці пасля прышчэпкі, ці была выяўленай алергічная рэакцыя, не паведамлялася.

Управа Следчага камітэта Гарадзенскай вобласці распачала крымінальную справу паводле факту неналежнага выканання прафесійных абавязкаў медыцынскімі работнікамі (ч.2 арт.162 КК).

Ігар Гаеўскі, які займаў на той час пасаду галоўнага дзяржаўнага санітарнага лекара Рэспублікі Беларусь, паведаміў БелаПАН 1 чэрвеня, што прыпыненне выкарыстання вакцыны будзе доўжыцца адзін-два дні. Была створаная спецыяльная камісія Міністэрства аховы здароўя для расследавання гэтага выпадку.

Аднак праверка зацягнулася на больш доўгі тэрмін. Ігар Гаеўскі пакінуў сваю пасаду, а цяпер Міністэрства аховы здароўя апраўдала вакцыну.

Гэта было чакана - 31 траўня гэтай вакцынай, акрамя загінулай дзяўчынкі, прышчапілі яшчэ дзевяць дзяцей, ад іх скаргаў не паступала. У 2015 годзе «Прыорыксам» былі прышчэпленыя звыш 226 тысяч дзяцей. За час ужывання гэтай вакцыны з 2012 года было зарэгістравана два выпадкі пабочных рэакцый, што склала 0,007 выпадку на 1000 прышчэпленых, гэта значыць, менш, чым дапускаецца вытворцам вакцыны (0,01 выпадку на 1000 прышчэпленых).

Аднак звяртае на сябе ўвагу, што вакцынацыя «Прыорыксам» адноўленая да таго, як Следчы камітэт назаве прычыну смерці дзіцяці.