Лукашэнка аб размеркаванні: Моладзь сама вызначыцца ў жыцці? Я супраць гэтага

Дыктатар катэгарычна не хоча адмаўляцца ад савецкай традыцыі, якая сябе даўно вычарпала.

На рэспубліканскім балі выпускнікоў ВНУ Лукашэнка адзначыў, што лёс моладзі «неабыякавы для дзяржавы». Паводле ягоных слоў, яна робіць тое, што павінна, прынамсі, арганізоўвае першае працоўнае месца ў спецыяльнасці.

- Не кожная дзяржава сабе гэта можа дазволіць. Ды і ў нас ішлі вельмі сур'ёзныя дэбаты апошнім часам, як быць у гэтым плане, праз тое, што мы трапілі ў паласу сур'ёзнай турбулентнасці ў эканоміцы, - цытуе словы Лукашэнкі БелТА.

- Прапаноўвалі адмовіцца: хай моладзь, якая скончыла ВНУ, сама вызначаецца ў жыцці. Я катэгарычна супраць гэтага. Мы захавалі для ўсіх вас магчымасць працаўладкавацца, пайсці на працу, астатняе - за вамі.

- Я бачу гатоўнасць маладога пакалення плённа працаваць і праяўляць ініцыятыву, - прадоўжыў дыктатар. - І я гэта вітаю. Бо вам трэба будзе асвойваць новыя тэхналогіі, развіваць вытворчасць, сферу паслуг, выводзіць беларускую культуру і навуку на лідаруючыя пазіцыі ў свеце.

Паводле слоў Лукашэнкі, сімвалічна, што выпускнікі пачынаюць працаваць у першы год новай пяцігодкі, на якую краіна ўскладае вялікія надзеі ў плане дынамічнага развіцця. Ён падкрэсліў, што дзяржава робіць стаўку на моладзь.

- Таму і ў нядаўна прынятай праграме (сацыяльна-эканамічнага развіцця Беларусі на 2016-2020 гады) адным з дзяржаўных прыярытэтаў з'яўляецца палітыка ў стаўленні да моладзі, - адзначыў правадыр.